रामचन्द्र पौडेलले देउवालाई समर्थन गरेको हल्ला, छोरा चिन्तनले भने– बुबा निष्पक्ष र तटस्थ 

काठमाडौं । नेपाली कांग्रेसको १४ औं महाधिवेशनमा नयाँ कार्यसमितिका लागि आज मतदान हुँदैछ । १३४ मध्ये २ पदमा निर्विरोध निर्वाचित भएपछि १३२ पदका लागि निर्वाचन हुँदैछ । नेता पौडेलले संस्थापन इतरमा सभापतिका लागि साझा उम्मेदवार खडा गर्न प्रयास गरेको भए पनि नसकेपछि आफू सभापतिको रेसबाट बाहिरिएका थिए । उनले डा. शेखर कोइरालालाई सभापतिमा समर्थन गरेका छन् ।

पौडेलले प्रष्ट रुपमा डा. कोइरालालाई समर्थन गरिसकेका छन् । तर निर्वाचनको अघिल्लो दिन आइतबार राति कांग्रेसका बरिष्ठ नेता रामचन्द्र पौडेलले सभापतिका उम्मेदवार शेरबहादुर देउवालाई समर्थन गरेको हल्ला फैलाइएपछि उनका छोरा चिन्तन पौडेलले उक्त हल्ला गलत भएको भन्दै सामाजिक संजालमा खण्डन गरेका छन् ।  

एकाएक देउवालाई समर्थन गरेको भनी हल्ला चलाइएपछि पौडेलका छोरा चिन्तनले सामाजिक संजाल फेसबुकमा यो समाचार गलत भएको भनी लेखेका छन् । उनले लेखेका छन् ‘यो समाचार गलत हो । मैले बुबाले देउवालाई समर्थन गर्नुभएको छ भनेँ भनेर लेखिएको कुरा भ्रमात्मक हो । यो महाधिवेशनमा बुबा बिलकुलै निष्पक्ष र तटस्थ रहनु भएको छ ।’ उनले अगाडि लेखेका छन्, ‘त्यसैले मलाई कोट गरेर भनिएको कुरा गलत हो । यस्ता गलत प्रचार नगर्न अनुरोध गर्दछु ।’