मेडिकल माफिया र भ्रष्टाचार आरोपीलाई सम्मान, पोखरेल, पछाई र ढकालमाथि अन्याय 

काठमाडौं । नेकपा एमालेले अइतबार ४४ जना केन्द्रीय सदस्य मनोनीत गरेको छ । एमाले केन्द्रीय कमिटी बैठकमा अध्यक्ष केपी ओलीले विधानअनुसार १० प्रतिशत केन्द्रीय कमिटी सदस्य मनोनयनका लागि ४४ जना नेताको नाम प्रस्ताव गरेका थिए ।

एमालेको केन्द्रीय कमिटीमा चितवनका कृष्णभक्त पोखरेल, जुम्लाका टेकराज पछाई, स्याङ्जाका सोभियत ढकाल पर्न सकेनन् । तर विवादास्पद मेडिकल कलेज संचालक दुर्गा प्रसाई, ३१ करोड भ्रष्टाचारमा विशेष अदालतमा मुद्दा खेपिरहेका बद्री न्यौपाने मनोनीत भएका छन् ।

एमालेमा माधव नेपालको नेतृत्वमा समानान्तर कमिटी गठन हुँदा कृष्णभक्त पोखरेलले ओलीलाई साथ दिएका थिए । तर पनि उनी एमालेको केन्द्रीय कमिटी सदस्यमा पर्न सकेनन् । १० बुँदे सहमति अनुसार उनले चितवनको अध्यक्ष पद समेत पार्वती रावललाई छाडेका थिए । तर पनि उनलाई एमालेले न्याय गर्न सकेन ।

सोभियत ढकाल नवौं महाधिवेशनमा मतगणना हुँदा केन्द्रीय सदस्य जितेको घोषणा तत्कालीन निर्वाचन मण्डलका सोमनाथ अधिकारी प्यासीले गरेका थिए । उनले बधाइ समेत खाए । तर भोलिपल्ट उनको मत कम देखाई खेम लोहनीलाई जिताइयो । उनलाई यो पटक पनि न्याय हुन सकेन ।

एमालेको केन्द्रीय सदस्य हुने आकांक्षा राखेका प्रेस चौतारीका पूर्वअध्यक्ष राजेन्द्र अर्याल, गगन बिष्ट समेत पर्न सकेनन् । प्रेस चौतारीका हालका अध्यक्ष गणेश बस्नेतले पनि पार्टीको केन्द्रीय सदस्यको चाहना राखेका थिए ।