पराजयपछि कमल थापाः पूर्वराजालाई गाली, लिङ्देनलाई बधाई

काठमाडौं । राप्रपाको अध्यक्षमा कमल थापा पराजीत भएका छन् । राजेन्द्र लिङ्देनले थापालाई पराजीत गरेका हुन् ।

हिन्दू धर्म र राजतन्त्रको वकालत गर्ने तर गणतन्त्रवादीसँग सत्तामा साझेदारी गरी भ्रष्टाचारमा मस्त भएकाले उनलाई राप्रपाका महाधिवेशन प्रतिनिधिले पराजीत गरिदिएका छन् । लिम्बुको छोरा भएर हिन्दू राज्यको वकालत गरेका लिङ्देनलाई बिजयी गराएपछि कमल थापाले सामाजिक संजालमा उनलाई बधाई त दिएका छन् । तर पूर्वराजा ज्ञानेन्द्र शाहलाई गाली गरेका छन् ।

शाहको नाम नलिई निर्मल निवासले राप्रपाको निर्वाचनमा नांगो हस्तक्षेप गरेको उल्लेख गरेका छन् । सिंगो मुलुक गणतन्त्रमय भएको बेला शिरमा कफन राजतन्त्रको एजेन्डा बोकेर हिंडेको पुरस्कार आफूलाई पराजीत गरेर राजाले दिएकोे भन्दै उनले ज्ञानेन्द्र शाहप्रति संकेत गर्दै लेखेका छन्–‘प्रजातान्त्रिक मूल्य र मान्यता आत्मसात गर्दै राप्रपा अध्यक्ष पदको निर्वाचनमा भएको पराजय सहर्ष स्वीकार गर्दछु । नवनिर्वाचित अध्यक्ष राजेन्द्र लिङ्देनलाई वधाई तथा शुभकामना ।

प्रतिकूल परिस्थितिमा समेत हामीमाथि विश्वास र भरोसा गर्ने पार्टीका सम्पूर्ण साथीहरुमा आभारी छु । पार्टीको आन्तरिक प्रतिस्पर्धामा निर्मल निवासको नांगो हस्तक्षेपको भत्सर्ना गर्दछु । मैले राहत र उन्मुक्ति पाएको छु ।

सिङ्गो मुलुक गणतन्त्रमय भएको बेला शिरमा कफन बाँधेर २०६३ सालदेखि राजसंस्था बोकेर हिँडेको पुरस्कार आज पाइयो । सो एजेण्डाको मूल संवाहकलाई राजनीतिक रुपमा समाप्त पार्न गरिएको चेष्टाले राजाको भलो होस् । 
हार्दिक शुभकामना  !