प्रधानन्यायाधीश जबरासँग गल्यो बार, १ महिना बिदा बसिदिन आग्रह

काठमाडौं । प्रधानन्यायाधीश चोलेन्द्र शमशेर जबराको राजीनामा मागेर आन्दोलित नेपाल बार एशोसिएशन अहिले सुस्ताएको छ । 

अधिकांश अधिवक्ताहरु नियमित बहसमा सहभागी हुन थालेपछि बारकाे आन्दोलन अहिले सुस्ताएको हाे ।

न्यायाधीशहरु पनि यही मंसिर १५ गतेदेखि गोलाप्रथा लागु हुने भएपछि सक्रियताका साथ अहिले इजलासमा फर्किएपछि बारले फेश सेभिङको लागि प्रधानन्यायाधीश चोलेन्द्र शमशेर जबरासँग सम्झौता गर्न लागेको छ ।

बारले भने पछिल्लो समय राजनीतिक दल गुहारे पनि दलहरुले समेत राम्रो रेस्पोन्स नगरेपछि निराश भएका बारका अगुवाहरूले पछिल्लो समय बारले प्रधानन्यायाधीश जबरालाई यो एक महिना विदामा बसिदिन आग्रह गरेका छन् ।

प्रधानन्यायाधीश जबरा विदामा बसे आफूहरु आन्दोलन स्थगित् गरेर नियमित सुनुवाईमा जान तयार रहेको सन्देश बारले पठाईसकेको छ । तर, प्रधानन्यायाधीश जबराले भने आफू कुनैपनि हालतमा विदामा नबस्ने आफ्नो सन्देश पठाईसकेका छन् ।

अदालत कुनैपनि हालतमा बन्धक बनाउन नहुने भनेर चौतर्फी दबाब सिर्जना भैरहेको छ । स्वतन्त्र कानून व्यवसायीहरु जनताको न्याय पाउने अधिकार बञ्चित गरिनुहुँदैन भनेर सडक संघर्षमा उत्रिएका छन् ।