यस्तो छ ओलीले प्रस्ताव गरेका १९ पदाधिकारी र ३०१ सदस्यीय केन्द्रीय कमिटी (सूचीसहित)

चितवन । नेकपा एमालेको दशौं महाधिवेशनमा अध्यक्ष केपी शर्मा ओलीले १९ पदाधिकारी र ३०१ सदस्यीय केन्द्रीय कमिटी घोषणा गरेका छन् । रातभर चलेको एमालेको बन्दसत्रमा ओलीले पदाधिकारीको टिम ३ बजे सार्वजनिक गरेका थिए । यद्यपि उनको सर्वसम्मत नेतृत्व चयन गर्ने योजनामा भीम रावल र घनश्याम भूसालले चुनौती दिएपछि निर्वाचन हुने नै भएको छ ।

राति ३ बजे ओलीले ३०१ जना केन्द्रीय सदस्य प्रस्ताव गरेका थिए । नामावली पढेर सुनाएपछि उनले अध्यक्ष मण्डलका भीम रावललाई मनाउने प्रयास गरेका थिए । एकताका निम्ति धेरै प्रयास गरेको दाबी गर्दै ओलीले रावलतर्फ संकेत गर्दै भनेका थिए–‘सिंगै हलले भनेको भन्दा बाहिर नजान आग्रह गर्दछु ।’

ओलीको आग्रहमा रावल सहमत भएनन् । उनले अध्यक्षमा उम्मेदवार हुने स्पष्ट पारेपछि हलमा होहल्ला भएको थियो । ओलीले  रावललाई उठ्न दिनुपर्ने धारणा राखेपछि हल शान्त भएको थियो । त्यसपछि ओलीले आफ्नोतर्फबाट नाम प्रस्ताव गरेका थिए । जुन नाम यसप्रकार छ ।

ओलीले घोषणा गरेका पदाधिकारी

उपाध्यक्षहरु युवराज ज्ञवाली, अष्टलक्ष्मी शाक्य, सुरेन्द्र पाण्डे, रामबहादुर थापा बादल, विष्णु पौडेल र सुवासचन्द्र नेम्वाङ छन् । सुरुमा नेम्वाङको नाम छुटाए पनि अन्तिममा राखेका थिए ।

त्यसैगरी महासचिवमा शंकर पोखरेल, उपमहासचिवमा प्रदीप ज्ञवाली, पृथ्वीसुब्बा गुरुङ र विष्णु रिमालको नाम प्रस्ताव गरेका छन् । 

ओलीले अघि सारेका सात सचिवमा टोपबहादुर रायमाझी, छविलाल विश्वकर्मा, रघुवीर महासेठ, लेखराज भट्ट, योगेश भट्टराई, गोकर्ण विष्ट र पदमा अर्याल छन् । नाम बाचनलगत्तै ओलीले बन्दसत्रको यो सेसन अन्त्य भएको घोषणा गरेका थिए ।