महाधिवेशन उद्घाटन स्टेजका लागि पचास लाख खर्च गरेकाे एमालेले कार्यकर्ताहरूलाई सडकमै खाना खुवायाे (फोटोफिचर)

चितवन ।  चितवनमा शुक्रबारबाट सुरू हुने नेकपा एमालेको १०औँ महाधिवेशनमा सहभागी हुन मुलुकका विभिन्न स्थानबाट आएका नेता कार्यकर्ताहरूले सडकमै खाना बनाएर खाएका छन् ।

पचास लाखमा महाधिवेशन उद्घाटन स्टेज तयार पारेको एमालेले चितवनका होटेल भरिभराउ भएकाे भन्दै जनकपुर, महोत्तरी र सर्लाहीबाट आएका कर्याकर्ताहरूलाई भने सडकमै खानाकाे व्यवस्था गरेकाे छ । 

जनकपुरबाट चारवटा जिपमा ५७ जनाको टोली शुक्रबार बिहान ८ बजे चितवन आइपुगेको छ । सर्लाहीको बरहथवा नगरपालिकाबाट दुईवटा बसमा ११५ जना आएका छन् ।   भरतपुरस्थित  बसपार्कमा साढे ८ बजे आइपुगेर उनीहरूले खाना पकाएर खाएका हुन । 

ग्यास, तरकारी, प्लेट, पानी आफैँ ल्याएको कार्यकर्ता सुदिप प्रसाद उप्रेतीले जानकारी दिए । 

महोत्तरी गौशालाबाट २५० जना कार्यकर्ता ५ बजे बसपार्क आइपुगेका थिए । चामल र तरकारी आफनै कार्यकर्ताबाट उठाएको गौशाला नगर कमिटी अध्यक्ष अजय कुमार कुशवाहले जानकारी दिए । 

होटेलमा बसेर र्खर्च गर्नुभन्दा आफै ल्याएर पकाएर खाएको उनले बताए । उनीहरू खाना खाइसकेर महाधिवेशनस्थल नारायणी नदी किनारमा जाने तयारीमा छन् ।