उद्घाटन अघि नै ढल्यो एमाले महाधिवेशनको स्वागतद्वार, ‘रामबहादुरको नेतृत्वमा बनाइएको गेट अयोध्याका रामले मन नपराएको टिप्पणी’

चितवन । नेकपा (एमाले) को महाधिवेशनका लागि बनाइएको स्वागतद्वार औपचारिक उद्घाटन हुनुअघि नै ढलेको छ । महाधिवेशनका लागि चितवनकै सौराहस्थित हात्तिचोकमा बनाइएको सहायक स्वागतद्वार गएराति गर्ल्यामगुर्लुम ढलेको हो। 

एमालेले महाधिवेशनका लागि चितवनमा मात्रै मुख्य र सहायक गरी ४५ गेट बनाइएको जनाएको छ। 

उद्घाटन अघि नै गेट ढलेको देखेर कतिपय व्यक्तिहरुले सामाजिक संजालहरुमा हतारको काम लतार भएको टिप्पणी गरेका छन् त कतिपयले त रामबहादुरको नेतृत्वमा बनाएको गेट अयोध्याका रामले मन नपराएकोसम्म भनेका छन्। 

यसैबिषयलाई लिएर गोरखा घर भइ हाल रोजगारीको सिलसिलामा कतार पुगेका “>नवराज सिम्खडाले फेसबुकमा लेखेका छन्, ‘महाधिबेशनको निम्ति बनाएको गेट महाधिबेशन उद्घाटन नहुदै गेट ढल्नु शुभ होइन । पक्कै पनि रामबहादुरको नेतृत्वमा बनाएको गेट अयोध्याका रामले मन परानन जस्तो छ।’

यस्तै, उनले अघि लेखेका छन्, ‘प्रचन्डको गृहजिल्लाको हावाले समेत देख्न सकेन एमालेको अधिबेशन।’

एमाले महाधिवेशन शुक्रबार औपचारिक रुपमा उद्घाटन हुँदैछ । महाधिवेशनका लागि एमाले अध्यक्ष केपी शर्मा ओलीलगायतका शीर्ष नेताहरु चितवन आइसकेका छन्।