एमालेको महाधिवेशन भड्किलो र खर्चिलोः बीसौं करोड रुपैयाँ कहाँबाट आयो ?

काठमाडौं । शुक्रबारदेखि आइतबारसम्म चितवनमा हुन गइरहेको नेकपा (एमाले)को दसौं महाधिवेशन बैचारिक बहसको थलो नहुने भएको छ । अध्यक्ष केपी शर्मा ओलीको देवत्वकरण गर्नेहरुकै बाहुल्य भएकाले त्यहाँ उनका ब्यक्तिवाद र ३ बर्षसम्म सत्तामा हुँदा गरेका भ्रष्टाचारका बिषयमा कसैले पनि प्रतिवाद गर्नसक्ने अवस्था छैन । भीम रावलले ऋषि धमलाको बाह्रमासे क्लवमा अध्यक्षमा उम्मेदवारी घोषणा गरे पनि चितवन पुग्दासम्म उनलाई महेश बस्नेत र क्षितिज थेबे संरक्षित चुल्ठेमुन्द्रेहरुले मनोनयन दर्ता गर्नसमेत दिने नदिने निश्चित छैन ।

एमालेको महाधिवेशन पार्टी लिने आगामी कार्यदिशा र देशको चिन्ता भन्दा भन्दा तडकभडक र तामझाम प्रदर्शनको हिसाबले चर्चामा छ । एउटा कम्युनिष्ट पार्टीको महाधिवेशन यति भड्किलो र खर्चिलो सायदै भएको होला,  तर ओलीको पार्टीले भने चितवनको महाधिवेशमा बीसौं करोडौं खर्च गरी तामझाम प्रदर्शन गरेको छ । 

एमालेले आधा करोड रुपैयाँ लागतमा मञ्च नै बनाएको छ । १५ लाख रुपैयाँमा फोटो खिच्नका लागि २५ ठाउँमा सेल्फी प्वाईन्ट बनाएको छ । एक करोड खर्च गरी ४४ वटा गेट बनाएको छ । ३ हजार ५ सय जनाका लागि रू ३ करोडको त भोजसहित होटेल खर्च छ । ५ लाख मान्छे आउने बस यातायात, बास खाना खर्च र तिनका होटल खर्चको हिसाब करोडौं  हुन आउँछ ।

र्यालीमा प्रयोग हुने मोटरसाइकलको पेट्रोल खर्च, ब्यानर, झण्डा फ्लेक्स खर्च, हेलिकप्टर हवाईजहाज खर्च, ठाउँठाउँमा २ करोडको बेलुन खर्च, ड्रोन प्रशारण खर्चको हिसाब अलगै छ ।

यत्रो पैसा आयो कहाँबाट आयो ? एमालेले हिसाब दिनुनपर्ने ? राजनीतिक पार्टीभित्र सुशासन र पारदर्शीता नभए ती पार्टीले देशको जिम्मेवारी लिदा प्रश्न उठ्नेछ । एमालेको महाधिवेशनको तामझाम र तडकभकडकका लागि कुन स्रोतबाट कसरी पैसा जम्मा भयो । ?  कसले हिसाब लिन्छ ? पैसा छाप्ने मेसिन नै पो राखेका होलान् कि ! कुरा गम्भीर छ । एमालेले रातारात थपेका फर्जी सदस्यसमेतको संख्यालाई नै मान्दा पनि ८ लाख हुन आउँछ । ८ लाख सदस्यले प्रतिब्यक्ति रू १००।– दिंदा पनि हुने त ८ करोड मात्र हो । महाधिवेशनमा २० औं करोड खर्च कसरी र कुन स्रोतबाट ल्याएको छ एमालेले कसले खोजी गर्ने ?

नेकपा समाजवादीका महासचिव बेदुराम भूसालले केपी शर्मा ओलीले ३ बर्ष सरकारमा रहँदा कति भ्रष्टाचार गरेका रहेछन् भन्ने कुरा चितवन महाधिवेशनको तामझामले देखाएको बताएका छन् । एउटा कम्युनिष्ट पार्टीको यति भड्किलो महाधिवेशन भ्रष्टाचारकै रकमको उपज भएको उनको भनाइ छ ।

 ओलीले प्रधानमन्त्री हुँदा यतिलाई राज्यका सबै सम्पत्ति सुम्पिएर प्राप्त गरेको रकम, ओम्नी, तारागाउँ विकास समितिको जग्गा हयात होटलबाट फिर्ता नगरेबापत लिएको अरब घुस, गिरीबन्धु टी स्टेटको हदबन्दी फुुकुवा गर्दा लिएको १ अर्ब घुस, फाष्टट्रयाकको टनेलको ठेक्कामा गरेको सेटिङ बापतको १० अर्ब घुसको रकम र वाइडबडी खरिदमा भएको घोटालाको समेत हिसाबकिताव एमालेका कार्यकर्ताले खोज्ने भएकाले उनले महाधिवेशन प्रतिनिधि पनि आफ्ना गुटका मात्र ल्याएका छन् । दस बुँदे समर्थकलाई छानीछानी घेराबन्दी गरी महाधिवेशन प्रतिनिधिमा रोक्न सफल भएका छन् ।