२५० जना स्वास्थ्यकर्मीको टोलीसहित एमाले महाधिवेशन उद्घाटनको दिन प्रत्येक र्‍यालीमा एउटा एम्बुलेन्स

 चितवन । नेकपा एमालेको १० औं राष्ट्रिय महाधिवेशनको उद्घाटन सत्रमा सहभागी हुने प्रत्येक र्‍यालीमा एउटा एम्बुलेन्स राखिने भएको छ ।

स्वास्थ्य व्यवस्थापन समिति संयोजक भानुभक्त ढकालका अनुसार चितवनका विभिन्न ठाउँहरू नवलपुरको गैँडाकोट, चितवनको केन्द्रीय बस टर्मिनल चोक, विशाल चोक, आँपटारी चोक, बेलचोक, त्रिचोकसहितबाट सुरु हुने र्‍यालीसँग एम्बुलेन्स पनि रहनेगरी काम भइरहेको छ ।

यस्तै नेपाल रेडक्रस सोसाइटीको प्राथमिक उपचारको तालिम लिएका स्वयंसेवकहरु पनि एम्बुलेन्ससँगै परिचालन हुने स्वास्थ्य व्यवस्थापन समितिले बताएको छ ।

उद्घाटन समारोह हुने मञ्चको आडैमा ‘क’ वर्गको एउटा र ‘ख’ वर्गको एउटा गरी दुई वटा एम्बुलेन्स तयारी अवस्थामा राखिने व्यवस्था भएकाे स्राेतले जानकारी दिएकाे छ । उद्घाटन सत्र सकिएपछि भने बन्दसत्र हुने स्थान सौराहामा केन्द्रित गरेर एम्बुलेन्सको व्यवस्थापन गरिनेछ ।

बन्दसत्र अवधिभर सौराहामा एमाले पार्टी अध्यक्ष केपी शर्मा ओली बस्ने ठाउँमा क वर्गको एम्बुलेन्स तयारी अवस्थामा राखिने छ भने थप चार वटा एम्बुलेन्स बन्दसत्र हुने स्थानको नजिकमा रहने छ ।

समितिका सदस्य डा. कृष्णप्रसाद अधिकारीका अनुसार महाधिवेशनमा सबै रोगका विज्ञ चिकित्सकसहित २५० जना स्वास्थ्यकर्मीको टोली आवश्यक औषधिसहित परिचालन हुने छन् भने बन्दसत्रमा बिरामी भएका प्रतिनिधिलाई चितवनका मेडिकल कलेजमा निःशुल्क उपचार गर्नेगरी सहमति समेत भएकाे छ ।