पत्रकारले दक्षिणपन्थी र प्रतिगमनविरुद्धको लडाईमा साथ दिनु पर्छ: माधव नेपाल

काठमाडौं। नेकपा एकीकृत (समाजवादी) का अध्यक्ष माधवकुमार नेपालले पत्रकारले प्रतिगामी तत्व र गलत प्रवृत्तिको भण्डाफोर गर्नुपर्ने बताएका छन् ।नेकपा एकीकृत समाजवादी  पार्टीले  दक्षिणपन्थी र प्रतिगमन विरुद्धको लडाई लडिरहेको  समेत बताएका छन् ।

उनले यो लडाई देशभक्ति र मूल्य मान्यताको लडाई भएको समेत बताए । शनिबार समाजवादी प्रेस संगठन नेपालको घोषणासभालाई सम्बोधन गर्दै अध्यक्ष नेपालले आफूहरुले सामाजिक न्यायसहितको समाजवाद चाहेको बताए ।

उनले भने, ‘हाम्रो पार्टी कम्युनिष्ट चरित्रको हुनेछ, हामी यसलाई व्यवहारमा देखाउँछौ, कम्युनिष्टहरू सकारात्मक सोचका साथ अघि बढ्नु पर्छ । योसँगै हामी दक्षिणपन्थ र प्रतिगमन विरुद्धको लडाई लडिरहेका छौं ।’

देशमा विभिन्न किसिमका भ्रष्टाचार, शोषण उत्पीडन र विकृति विसंगति मौलाइरहेको बताउँदै उनले पत्रकारहरुले पनि त्यसखालका विकृति विसंगितविरुद्ध कलम चलाउनुपर्नेमा जोड दिए । अध्यक्ष नेपालले पछिल्लो समय देशमभर समाजवादी पार्टीमा आकर्षण बढेको र प्रवेश गर्नेहरुको लहर चलिरहेको बताए ।