कारबाही रोक्न माग गर्दै नेपाल पक्षका १४ सांसद संसद सचिवालय पुगे

काठमाडौं । नेकपा एमालेका अध्यक्ष केपी शर्मा ओलीले गरेको कारबाहीअनुसार आफूहरुलाई पदमुक्त नगर्न माग गर्दै १४ सांसदले सचिवालयमा निवेदन दिएका छन् ।

२७ वैशाखमा तत्कालीन प्रधानमन्त्री ओलीले विश्वासको मत लिँदा संसदीय दलले ह्वीप नै नलगाएको र ३ साउनमा प्रधानमन्त्री शेरबहादुर देउवालाई मत दिएको आधारमा कारबाही गर्नु सर्वोच्च अदालतको फैसला विपरीत भएको बताउँदै उनीहरूले सचिवालयमा निवेदन दिएका हुन् ।

१४ सांसदको संयुक्त पत्र लिएर विरोध खतिवडा र जीवनराम श्रेष्ठ संसद सचिवालय गएका हुन् ।

अध्यक्ष ओलीले मंगलबार वरिष्ठ नेता माधवकुमार नेपालसहित १४ सांसदलाई दलको ह्वीप उल्लंघन गरेकाे भन्दै पदमुक्त गर्न संसद सचिवालयमा पत्र पठाएका थिए ।