लुम्बिनी प्रदेश प्रमुख शेरचनद्वारा पदभार ग्रहण, मुख्यमन्त्री पोखरेल र मन्त्री गएनन् 

काठमाडौं । लुम्बिनी प्रदेशका प्रदेश प्रमुख अमिक शेरचनले शुक्रबार पदभार ग्रहण गरेका छन् । यसअघिका प्रदेश प्रमुख धर्मनाथप्रसाद यादवलाई गौतमबुद्ध विमानस्थलमै स्वागत गर्न पुगेका र पदभार कार्यक्रममा मुख्यमन्त्रीसहितका मन्त्रीहरु पुगेका थिए । तर शेरचनलाई स्वागत गर्न प्रदेश सरकारका कुनै पनि मन्त्री गएनन् । पदभार कार्यक्रम पनि मुख्यमन्त्री शंकर पोखरेलले बहिस्कार गरेका छन् । पदभार कार्यक्रममा कुनै पनि मन्त्रीसम्म नपठाएर मुख्यमन्त्री पोखरेलले राजनीतिक संस्कार समेत देखाएनन् ।

यसअघिका प्रदेश प्रमुखको पदभार मात्र होइन, बिदाई कार्यक्रममा मुख्यमन्त्री शंकर पोखरेलदेखि मन्त्री र सचिवालयका कर्मचारीसम्म सहभागी थिए । र, फोटोसेसन गरी बिदाई गरिएको थियो । अविश्वास प्रस्तावको सामना नै नगरी मुख्यमन्त्री नियुक्ति गरी भर्याङमा सपथ गराएका प्रदेश प्रमुख यादवको स्वागत र बिदाइमा आफैं सशरीर सहभागी भएका पोखरेलले शेरचनको पदभारमा मन्त्रीसमेत पठाएनन् । यादवभन्दा अघिका प्रदेश प्रमुख उमाकान्त झाको बिदाईमा कानुन मन्त्री त उपस्थित थिए, तर शेरचनको पदभार कार्यक्रममा प्रदेश सरकारका मन्त्रीसमेत देखिएनन् ।

पूर्व प्रदेश प्रमुख यादवको बिदाइ कार्यक्रममा मुख्यमन्त्री पोखरेल

शुक्रबार प्रदेश प्रमुख शेरचनको पदभार कार्यक्रममा पोखरेलले देखाएको संस्कारहीनताले उनको कद नै होचो बनाएको टिप्पणी भएको थियो ।

मुख्यमन्त्री पोखरेलको सरकार अल्पमतमा छ । उनको सरकारमा सहभागी जसपाका तीन मन्त्रीलाई पार्टीले निस्कासन गरिसकेको छ । ती सांसद निस्कासित नहुँदा पनि पोखरेलको सरकार अल्पमतमा छ । उनलाई दाङकै प्रदेससभा सदस्य विमला ओलीदेखि अमर डाँगीसम्मले छाडिसकेका छन् ।