टोकियो ओलम्पिक २०२० : नेपालको यात्रा समाप्त, पहिलो चरणबाटै बाहिरिइन् चौधरी

काठमाडौं। जापानको टोकियोमा जारी ओलम्पिक खेलमा सहभागी सबै नेपाली खेलाडी बाहिरिएका छन्। 

आज (शुक्रबार) बिहान भएको अन्तिम प्रतिस्पर्धामा एथलेटिक्स खेलाडी सरस्वती चौधरी पहिलो चरणबाटै बाहिरिएकी छिन्।

चौधरीले महिलाको १ सय मिटर दौडमा प्रतिस्पर्धा गरेकी थिइन्। उनले निर्धारित दूरी १२ दशमलव ९१ सेकेन्डमा पूरा गरेपनि अघिल्लो चरण पुग्न असफल रहिन्। 

सरस्वती आफ्नो हिटमा ९ जनामा आठौं स्थानमा रहिन्। ओलम्पिकमा नेपालका पाँच खेलाडीले प्रतिस्पर्धा गरेका थिए। ती मध्ये कुनै खेलाडी पनि दोस्रो चरणमा पुग्न सकेनन्। 

यसअघि पौडीका एलेक्जेन्डर शाह (एलेक्स), गौरिका सिंह, र सुटिङकी कल्पना परियारले भने राष्ट्रिय कीर्तिमान बनाएका थिए  ।