काठमाडौं । काठमाडौंबाट धनगढीका लागि उडेकाे बुद्ध एयरकाे जहाज त्रिभुवन विमानस्थलमा आकस्मिक अवतरण भएको छ ।
सोमबार साँझ 9N-AMD जहाज भरतपुर क्षेत्रबाट डाइभर्ट गरेर पुन: त्रिभुवन अन्तर्राष्ट्रिय विमानस्थलमै आपतकालीन अवतरण गरिएको बुद्ध एयरले जनाएको छ ।
बुद्ध एयर स्रोतका अनुसार जहाजमा ‘प्राविधिक गडबडी’ आएको पत्ता लागेपछि चालक दलका सदस्यले जहाज तत्काल विमानस्थल फर्काउने निर्णय लिएका थिए ।
त्यसपछि जहाज विमानस्थलमा सुरक्षित अवतरण गराइएको छ । जहाजमा ६९ जना यात्रु सवार थिए । उनीहरुलाई आजै अर्को जहाजबाट धनगढी पठाइँदैछ ।
