एजेन्सी । पाकिस्तानविरुद्धको तीन खेलको एकदिवसीय क्रिकेट सिरिज घरेलु टिम इंग्ल्यान्डले जितेको छ ।
मंगलबार राति भएको तेस्रो तथा अन्तिम एकदिवसीय खेलमा पाकिस्तानलाई ३ विकेटले पराजित गर्दै इंग्ल्यान्डले ३-०ले सिरिज जितेको हो ।
पाकिस्तानले दिएको ३ सय ३२ रनको फराकिलो लक्ष्य इंग्ल्यान्डले ४८ ओभरमा ७ विकेट गुमाएर पूरा गर्यो । इंग्ल्यान्डको जितमा जेम्स भिन्सले शतकीय इनिङ्स खेले ।
यस्तै, लेविस ग्रेग्रोरीले ७७ रनको अर्धशतकीय इनिङ्स खेल्दा जाक क्रलीले ३९ रन बनाए । फिल साल्टले ३७ र कप्तान बेन स्टोक्सले ३२ रन जोडे ।
पाकिस्तानका हरिस राउफले ४ विकेट लिए । शादब खानले २ विकेट लिए ।
यसअघि पहिले ब्याटिङ गरेको पाकिस्तानले ५० ओभरमा ९ विकेट गुमाएर ३ सय ३१ रन बनाएको थियो ।
पाकिस्तानका लागि कप्तान बाबर आजमले १ सय ५८ रनको शतकीय इनिङ्स खेले । मोहमद रिजवानले ७४ रनको अर्धशतकीय इनिङ्स खेल्दा इमाम उल हकले ५६ रनको योगदान दिए ।
इंग्ल्यान्डका ब्रेडन कार्सेले ५ तथा सकिब मोहमुदले ३ विकेट लिए ।
