काठमाडौं । नेपाली चलचित्रकी नायिका जेनी कुँवरले आफू बस्ने अपार्टमेन्टमा आत्महत्या गरेकी छिन् । कुँवरले थापागाउँस्थित सनराइज सिटी अपार्टमेन्टमा बिहीबार राती आत्महत्या गरेको महानगरिय प्रहरी परिसर काठमाडौंका प्रमुख एसएसपी अशोक सिंहले जानकारी दिएका छन् । एसएसपी सिंहका अनुसार उनको शव उक्त अपार्टमेन्टमा फेला परेको हो । उनले किन आत्महत्या गरिन् भन्ने विस्तृत जानकारी भने प्रहरीले दिएको छैन ।
प्रारम्भिक अनुसन्धानमा आत्महत्या गरेको खुलेको र घटनाबारे मुचुल्का तयार पार्ने काम भैरहेको एसएसपी सिंहले जानकारी दिएका छन् ।
‘जिन्दगानी’ नामक फिल्मबाट अभिनय यात्रा थालेकी कुवँर पछिल्लो अधिकांश समय पशुपति मन्दिर परिसरमा बिताउँदै आएकी थिइन् । उनले ४ वटा घर गरिबलाई दिएर आफू साधु बनेको बताएकी थिइन् ।
नायिका कुवँरले मैदान, जीवनदाता, कानून, अभिमन्यू, विन्तिपत्र, मलाई माफ गरिदेऊलगायतका थुप्रै फिल्ममा अभिनय गरेकी छन् ।
