कोरोना महामारीले भयाबह रुप लिंदै, प्रधानमन्त्री ओली आफ्नै सरकारले गरेको निर्णयबिपरीत उदघाटनमा भीड जम्मा गर्दै 

काठमाडौंं । कोरोना महामारीले भयाबह रुप लिंदैछ । बाँकेमा २४ घण्टामा सात सङ्क्रमितको मृत्यु भएको छ ।  सरकारले कोभिड–१९ महामारीको दोस्रो लहर शुरु भएको भनेर बैशाख ६ गतेबाट प्रतिबन्धात्मक व्यवस्थाहरु लागू गरेको छ । तर ती ब्यवस्थाहरु सरकार आफैं उल्लंघन गर्न तल्लीन छ ।

प्रधानमन्त्री केपी ओलीले बैशाख ७ मा बालुवाटारमा भव्य पूजाआजा गरे । वैदिक अनुष्ठानसहित पूजा गरेर राम, सीता, लक्ष्मण र हनुमानका मूर्ति चितवनको देवघाट पठाउने कार्यक्रममा सयौंको उपस्थिति थियो । कोरोना महामारीमा आफैंले लागू गरेको २५ जनाभन्दा बढी भेला हुन नपाउने ब्यवस्था प्रधानमन्त्री ओलीले उल्लंघन गरे ।  सामाजिक दूरी कायम गर्ने,  ५ जना भन्दा बढी भेला नहुने जस्ता मापदण्ड पालना गराउनुपर्ने सरकार नै सयौं हजारौको भीड जम्मा गरी कोरोना संक्रमण फैलाउन उद्यत भएको छ ।

काठमाडौंबाट चितवनको अयोध्याधाममा रामसीताको मूर्ति पठाउँदा त्यहाँ पनि हजारौंको भीड जम्मा गरी कोरोना महामारी रोक्नका लागि लागू गरिएको मापदण्ड उल्लंघन गरियो ।

आज धरहरा उद्घाटन पनि प्रधानमन्त्री ओलीले भर्चुअल गर्नसक्थे । तर उनले तामझामसहित उदघाटन गरी कोभिड–१९ का बिरुद्ध लागू गरिएका प्रतिबन्धात्मक ब्यवस्था उल्ल्रघन गरेका छन् । बालुवाटारबाट सुरु नै नभएका सडक, अस्पताल स्वीच थिचेर शिलान्यास गर्ने ओलीले धरहरा उदघाटनमा भने उनकै शब्दमा भन्दा भीड जम्मा गरी तमासा देखाउन लागेका छन् ।

त्यसो त एक बर्षअघि कोरोना महामारीमा पनि तत्कालीन नेकपाको बहुमतले उनको राजीनामा माग्दा आफूनिकट विद्यार्थी संगठनका नेतालाई सरकारको समर्थनमा सडकमा नाराबाजीमा उतारेका थिए ।