कर्णालीमा फ्लोर क्रस गर्ने चार सांसदलाई आजै पार्टीबाट हटाउने

काठमाडौं । आज बस्ने नेकपा एमाले महाधिवेशन आयोजक कमिटीको बैठकले कर्णाली प्रदेशमा फ्लोर क्रस गर्ने चारजना प्रदेश सभा सदस्यलाई सांसद पद र पार्टी सदस्यताबाटै हटाउने तयारी गरेको छ ।

बैठकले कर्णालीका मुख्यमन्त्री महेन्द्र बहादुर शाही नेतृत्वको सरकार जोगाउन पार्टी निर्देशनविपरीत ह्वीप उल्लंघन गरेकाे भन्दै उनीहरुलाई पार्टी र प्रदेश सभा सदस्य पदबाट हटाउन लागेकाे हो ।

गतसाता पार्टीको ह्वीप उल्लंघन गर्दै कर्णाली प्रदेशका सांसद प्रकाश ज्वाला, कुर्मराज शाही, नन्दसिंह बुढा र अमरबहादुर थापाले मुख्यमन्त्री महेन्द्रबहादुर शाहीलाई विश्वासको मत दिएका थिए ।

बालुवाटारमा आज बिहान ११ बजेपछि  बस्ने बैठकमा कर्णाली प्रदेशका ५ सहित ३२ सांसदलाई सोधिएको स्पष्टीकरणबारे विश्लेषण गर्नुका साथै नेता माधव कुमार नेपालसहितका संघीय सांसदहरुले बुझाएकाे स्पष्टीकरण अध्ययन गरेर निर्णय लिइने भएको छ ।

स्राेतका अनुसार फ्लोर क्रस गर्ने चार जना सांसदको कारवाही निश्चित छ ।

यसअघि वैशाख ६ गते बसेको बैठकले माधव नेपालसहित भीम रावल, घनश्याम भुषाल र सुरेन्द्र पाण्डेलाई पार्टीबाट  ६ महिनाका लागि निलम्बन गरिसकेकाे छ ।