एकतर्फी र बिनाकारणका कारबाहीकाे शृखंलाले पार्टी एकतामा गम्भीर संकट पैदा गर्दैछ: गोकर्ण विष्ट

काठमाडौं ।  नेकपा एमालेका नेता तथा पुर्व श्रम मन्त्री गोकर्ण विष्टले नेकपा एमालेमा देखापरेका समस्याहरुको समाधानकालागि संयमीत र जिम्मेवारीपूर्ण पहल गर्नुपर्ने बताएका छन् ।

उनले सामाजिक संजाल  फेसबुकमा स्टाटेस लेख्दै एकपछि अर्को एकतर्फी र बिनाकारण सांसदहरुमाथी कारबाहीका शृखंलाहरुले पार्टी एकतामा गम्भीर संकट पैदा गरेकाे बताउँदै समस्या समाधानकालागि जिम्मेवारीपूर्ण पहल गर्नुपर्ने बताएका हुन् ।

उनले संवादहीनता र कारबाहीको बाटोले कुनैपनी हालतमा समस्या समाधान नहुने बताउँदै अदालतको फैसला बमोजिम एमालेलाई नेकपा एकतापूर्वको अवस्थामा फर्काएर पार्टीलाई विचार र विधिबाट संचालन गरी पार्टी एकता जोगाउन आग्रह समेत गरेका छन् ।

“एउटा इमान्दार कार्यकर्ताकोलागि पदीय हैसियत भन्दा पार्टी र आन्दोलनको भविष्य सधैं माथी हुन्छ । यसर्थ एमालेका नेता, कार्यकर्ता, समर्थक र शुभचिन्तकको चाहना बमोजिम एकतापूर्वको एमालेका सम्पूर्ण आधिकारिक कमिटीहरु ब्युँताएर विधि मार्फत समाधान खोज्न म आग्रह गर्दछु ।” उनले भने