संसद अधिवेशनकाे अन्त्य, संसदीय व्यवस्थामाथिको प्रहार: प्रकाशमान सिंह

काठमाडौं । नेपाली कांग्रेसका नेता प्रकाशमान सिंहले सरकारले संसद अधिवेशन स्थगित गर्नु संसदीय व्यवस्थामाथिको प्रहार भएकाे बताएका छन् ।

नेपाल प्रेस युनियन काठमाडौं शाखाले नेपाल पत्रकार महासंघका नवनिर्वाचित कार्य समितिहरुलाई बधाई तथा सम्मान दिन सोमबार काठमाडौंमा आयोजना गरेको कार्यक्रममा बोल्दै नेता सिंहले ओली सरकारले अधिवेशन स्थगित गरेर संसदीय व्यवस्थामाथिको अर्काे प्रहार गरेकाे आराेप लगाएका हुन् ।

उनले सरकारले आफ्नो कायरता प्रदर्शन गरेको टिप्पणी गर्दै असंवैधानिक रुपमा संसद विघटन गर्नु प्रधानमन्त्रीले संसदलाई सामना गर्न नसकेको बताएका छन् ।

राजनीतिक, संवैधानिक र नैतिक हिसाबले हैसियत गुमाइसकेको ओली सरकारलाई हटाई कांग्रेसको नेतृत्वमा नयाँ सरकार बनाउनुपर्ने पनि उनले बताएका छन् ।

सोमबार मन्त्रिपरिषदको सिफारिसमा राष्ट्रपति विद्यादेवी भण्डारीले संसद अधिवेशन स्थगित गरेकी छन् ।