ओलीको जिल्लामा एमालेको समानान्तर कमिटी गठनः  अध्यक्षमा रेग्मी,  सचिवमा  बराल

झापा । नेकपा (एमाले)का बरिष्ठ नेता माधवकुमार नेपाल र झलनाथ खनाल समूहले शुक्रबार बिर्तामोडमा कार्यकर्ता भेला गरेर वेदराज रेग्मीको अध्यक्षतामा ३५१ सदस्यीय समानान्तर जिल्ला कमिटी गठन गरेको छ । समितिको उपाध्यक्षमा चन्द्रा श्रेष्ठ, सचिवमा निलमणि बराल, सहसचिवमा मणि भण्डारीलाई चयन गरिएको छ ।

एमालेको माधव–झलनाथ समुहले यसअघि ७० वटा जिल्लामा समानान्तर जिल्ला कमिटी गठन गरिसकेको छ । 

 १ नम्बर प्रदेशमा सोलुखुम्बु, २ नम्बरमा महोत्तरी, गण्डकी प्रदेशमा मनाङ र मुस्ताङ, लुम्बिनी प्रदेशमा पाल्पा, कर्णाली प्रदेशमा कालिकोटमा समानान्तर कमिटी गठन गर्न बाँकी छ । बागमती र सुदूर पश्चिम प्रदेशका सबै जिल्लामा समानान्तर कमिटी गठन भइसकेका छन् । 

ओलीले झुटको खेती गरेः नेपाल

नेपाल कम्यूनिस्ट पार्टी (एमाले) बरिष्ठ नेता माधवकुमार नेपालले प्रधानमन्त्री तथा पार्टी अध्यक्ष केपी शर्मा ओलीले झुटको खेती गरी भ्रम सिर्जना गरेको आरोप लगाएका छन् । 

उनले अब पार्टीमा नयाँ पुस्तालाई आकर्षित गर्न सत्यतथ्य र विधिमा आधारित राजनीतिक प्रशिक्षण दिन जरुरी भएको धारणा व्यक्त गरेका छन् ।  बिर्तामोडमा शुक्रबार जिल्ला कमिटी गठन गर्न आयोजित कार्यकर्ता भेलालाई सम्बोधन गर्दै उहाँले अध्यक्ष ओलीले निष्काशन गरेका र नसमेटेकालाई बटुलेर आफूले ७५ वटै जिल्लामा कमिटी बनाउन बाध्य भएको जिकिर गरेका छन् ।