प्रधानमन्त्रीलाई पदबाट हटाउन प्याकेज सहमति

काठमाडौं । प्रधानमन्त्री केपी शर्मा ओलीलाई पदबाट हटाउन दलहरुले केन्द्र देखि प्रदेशसम्म प्याकेजमा सहमतिकाे प्रयास गरिरहेका छन् ।

स्रोतका अनुसार प्रदेशहरुमा मुख्यमन्त्री फेरबदल देखि केन्द्रमा मन्त्री र उपसभामुखसम्ममा प्याकेजमा सहमतिको कुरा अगाडि बढेको हो । ओलीनिकट मुख्यमन्त्रीहरुलाई हटाएर समिकरणभित्रका दलहरुले आफू निकटस्थलाई बनाउने तयारी थालेका छन् ।

यसमा काँग्रेस, माओवादी केन्द्र र राष्ट्रिय जनमोर्चाको समिकरण देखिएको छ । 

केन्द्रमा ओलीविरुद्ध अविश्वासको प्रस्ताव ल्याउन काँग्रेस र माओवादी केन्द्र सहमत भएपनि जसपा अलमलमा छ । जसपाले आफूहरुको माग सम्बोधनको मुद्दा उठाएपनि चुरो विषय सत्ताको नेतृत्वको छ ।

माओवादी केन्द्र जसपालाई सत्ता नेतृत्व दिन तयार भएपनि काँग्रेसको आफ्नै दाबी छ । काँग्रेस सभापति शेरबहादुर देउवा पछि हटेमा सहमति बन्न सक्छ । या त जसपा अध्यक्ष महन्थ ठाकुर पछि हट्नुपर्छ । अब राजनीतिक लेनदेनबाट सहमति निकाल्ने प्रयास भइरहेको छ ।