श्रम संस्कृति पार्टी धनकुटाका नगर सचिव मगरसहित ८ जना जुवा खेल्दाखेल्दै पक्राउ

धनकुटा । धनकुटा नगरपालिका–१, स्थित हिलेबाट श्रम संस्कृति पार्टीका नगर सचिव तथा नेपाल मगर संघ जिल्ला अध्यक्ष तेजबहादुर मगरसहित आठ जना जुवााडेहरुलाई प्रहरीले नगदसहित पक्राउ गरेको छ ।

आइतबार राति तासको खालबाट नगद, तास र गोटीसहित पक्राउ गरिएको हो । पक्राउ पर्नेमा धनकुटा नगरपालिका–१, घर भएका ४४ बर्षीय तेजबहादुर मगर रहेका छन् ।

यस्तै सोही ठाउँ बस्ने अन्दाजी ५२ बर्षीय मोहनबहादुर बिक, ४५ बर्षीय रमेश राई, ३८ वर्षीय सविन तामाङ, ५३ बर्षीय रमेश भण्डारी, ३२ बर्षीय दीपेन्द्र मगर, ५० बर्षीय रमेश कार्की र महालक्ष्मी नगरपालिका–८ बस्ने ३६ बर्षीय रामकाजी विक रहेका छन् ।

तासको खालबाट उनीहरुलाई १ लाख १४ हजार ५५० रुपैयाँ नगद, ४ बुङ तास र १ सय १९ थान गोटीसहित पक्राउ गरिएको जिल्ला प्रहरी कार्यालय धनकुटाका प्रहरी प्रवक्ता डीएसपी हेमन्त भण्डारी क्षेत्रीले जानकारी दिए ।

५, २०, ५० र ५ सय अंक लेखिएका गोटीसमेत बरामद भएको थियो । हिलेस्थित एक घरको अन्डरग्राउण्ड कोठामा भित्र तास खेलिरहेको विशेष सूचनाका आधारमा जिल्ला प्रहरी कार्यालय धनकुटाबाट प्रहरी निरीक्षक रामप्रसाद खनालको कमाण्डमा खटिएको प्रहरी उनीहरुलाई नियन्त्रण लिएको प्रहरीले जनाएको छ । नियन्त्रणमा लिइएकाहरुलाई जिल्ला प्रहरी कार्यालय धनकुटामा राखी थप अनुसन्धान भइरहेको प्रहरीले जनाएको छ ।