पक्राउ परेको भोलिपल्टै दुर्गा प्रसाई छुटे

काठमाडौं । भक्तपुर जिल्ला अदालतको आदेशपछि मेडिकल ब्यवसायी दुर्गा प्रसाई रिहा भएका छन् । भक्तपुर जिल्ला अदालतले म्यादथप नगरी उनलाई सोमबारै रिहा गरेको हो । आइतबार राति प्रसाईलाई प्रहरीले नियन्त्रणमा लिएको थियो ।

अदालतको आदेशबाट रिहा भएलगत्तै व्यवसायी तथा अभियन्ता दुर्गा प्रसाईंले आफ्नो पक्राउलाई लोकतन्त्र, अभिव्यक्ति स्वतन्त्रता र विचारमाथिको हस्तक्षेप भएको टिप्पणी गरेका छन ।

रिहा भएलगत्तै सञ्चारकर्मीसँग प्रतिक्रिया दिँदै प्रसाईंले लोकतन्त्र विचारहरूको खुला बजार भएको उल्लेख गर्दै नागरिकले आफ्नो धारणा स्वतन्त्र रूपमा व्यक्त गर्न पाउनुपर्ने बताए । विचार राखेकै आधारमा पक्राउ गरिनु लोकतान्त्रिक मूल्य–मान्यताविपरीत भएको उनको भनाइ छ ।

यसअघि आफूले दिएको ‘सिंहदरबार र सर्वोच्च अदालतमा आगो लगाउने’ भन्ने अभिव्यक्तिलाई उनले प्रतीकात्मक रूपमा बुझ्नुपर्ने दाबी गरे ।

उनका अनुसार सरकारका गलत कामका कारण जनताको मनमा र न्यायप्रतिको विश्वासमा पहिले नै ‘आगो लागिसकेको’ अवस्थालाई संकेत गर्न उक्त अभिव्यक्ति प्रयोग गरिएको थियो ।

प्रसाईंले वर्तमान राजनीतिक नेतृत्व जनअपेक्षा पूरा गर्न असफल भएको आरोप लगाउँदै सरकारको कडा आलोचना गरे। उनले आफूविरुद्ध कारबाही गर्नुभन्दा पहिले आफ्ना आरोपहरूलाई प्रमाणसहित खण्डन गर्न गृहमन्त्रीलाई चुनौती दिए ।

‘म सत्यका लागि लडिरहेको छु, जस्तोसुकै दबाब आए पनि पछि हट्दिनँ’ भन्दै उनले आफू आफ्नो अभियानबाट नहट्ने अडान दोहोर्याए ।

साथै, वर्तमान राजनीतिक व्यवस्था परिवर्तन नगरेसम्म देशको भविष्य सुनिश्चित नहुने दाबी गर्दै उनले नागरिकलाई ‘गणतन्त्र नामको रोग’ विरुद्ध एकजुट हुन आह्वान गरे।
प्रसाईं सार्वजनिक शान्तिविरुद्धको कसुरमा पक्राउ परेका थिए । तर, अनुसन्धानका लागि थप थुनामा राख्न प्रहरीले माग गरेको म्याद भक्तपुर जिल्ला अदालतले अस्वीकार गरेपछि उनी सोमबार रिहा भएका हुन् ।