बुढानीलकण्ठ स्कुललाई १५ करोड अनुदान, मन्त्री वाग्लेले गरे आफ्नै हात जगन्नाथ

काठमाडौं । बजेटअघि करका दर हेरफेर हुने सूचना चुहावट गरी बिवाईडी, डिपलसमेत २ हजार ७ सय बिजुली गाडी(ईभी) भित्र्याउन सहयोग गरी अरबौं राजस्व हिनामिना गर्न सहयोग गरेको आरोप लागेका अर्थमन्त्री डा. स्वर्णिम वाग्लेले बूढानीलकण्ठ स्कुललाई १५ करोड रुपैयाँ अनुदान दिएको खुलेको छ ।

अर्थमन्त्री वाग्लेले अध्ययन गरेको उक्त विद्यालयलाई १५ करोड रुपैयाँ अनुदान दिएका छन् । नियमित अनुदानबाहेक उक्त स्कूललाई मन्त्री वाग्लेले थप १५ करोड ५० लाख रुपैयाँ अनुदान दिएका छन् । मन्त्री वाग्लेले आफ्नै हात जगन्नाथ भनेझैं बुढानीलकन्ठ स्कुललाई थप १५ करोड अनुदान दिएका छन् ।

कतिपय सामुदायिक बिद्यालयमा शिक्षक अभाव भएर राम्रोसँग अध्यापन हुनसकेको छैन । सीमित स्रोत साधनका बाबजुद गुणस्तरीय शिक्षा प्रदान गर्दैआएका सामुदायिक बिद्यालयलाई प्रोत्साहन गर्नुपर्नेमा पहुँचवालाका छोराछोरी अध्ययन गर्ने बूढानीलकण्ठ स्कुललाई अर्थमन्त्रीले राष्ट्रको ढुकुटीबाट १५ करोड अनुदान दिएका छन् । विगतका सरकारमाथि बजेट बितरणमा मनपरी गरेको आरोप लगाउँदैआएका मन्त्री वाग्लेले उनीहरुलाई समेत माथ गर्दै आफैंले पढेको स्कुललाई अनुदानमाथि अनुदान थप गरी पोसेका छन् ।

शिक्षा तथा खेलकुद मन्त्रालयको बजेटमा बूढानीलण्ठ स्कुललाई नियमित छात्रवृत्ति अनुदानबापत ६ करोड अनुदान छुट्याइएको थियोे । त्यसबाहेक मन्त्री वाग्लेले थप १५ करोड ५० लाख रुपैयाँ उपलब्ध गराउने निर्णय गरेका छन् । मन्त्री वाग्लेले १५ करोड रुपैयाँ अनुदान दिएपछि पूर्वविद्यार्थीको संगठन बूढानीलकण्ठ अल्मुनाई र उनीनिकटका कर्मचारी खुसी भएका छन् । आफ्नै हात जगन्नाथ भनेझैँ अर्थमन्त्री वाग्लेले आफू पढेकै विद्यालयलाई औचित्यबिना यति धेरै अनुदान दिएको विषय सर्वत्र चर्चा भएको छ ।

मन्त्री वाग्लेले प्रस्तुत गरेको बजेटमा गण्डकी आवासीय माध्यमिक विद्यालयलाई छात्रवृत्ति अनुदानबापत २ करोड, स्वर्गद्वारी आश्रमलाई ५ लाख, काशी हिन्दु विश्व विद्यालयमा नेपालको तर्फबाट प्रतिनिधित्व गर्ने नेपाली चेयरको सुविधाबापत ६० लाख रुपैयाँ बजेट छुट्याइएको छ ।