मन्त्री रावलद्वारा नापी विभागले विकास गरेको मेरो कित्ता मोवाइल एप सार्वजनिक

काठमाडौं । भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलले नापी विभागले विकास गरेको मेरो कित्ता मोवाईल एप एक समारोहका बीच सार्वजनिक गर्नुभएको छ ।

बिहीबार सार्वजनिक गरिएको मोवाइल एपबाट सेवाग्राहीले घरमै बसी नक्सा प्रिन्ट, फिल्डबुक उतार, प्लट रजिष्टर उतार, फिल्ड रेखांकन सेवाका लागि घरबाटै निवेदन दिन सक्नेछन् । मोवाइल एपबाटै राजस्व तिर्न सकिने र नक्सा, फिल्डबुक, प्लट रजिष्टर डाउनलोड गरी आवश्यकता अनुसार प्रिन्ट गर्न सकिने व्यवस्था गरिएको छ ।

उक्त एप मोवाइलको प्लेस्टोरबाट डाउनलोड गर्न सकिन्छ । साथै मेरो कित्ता बेव भर्सनमा पनि उपलब्ध छ । मन्त्री रावलले पद सम्हालेपछि जनसम्पर्क हुने कार्यालयमा हुने ढिलासुस्ती र अनियमितता हटाउने र अनलाइन सेवालाई प्रभावकारी बनाउने क्रमा सुरु भएको छ । नापी बिभागले आज सार्वजनिक गरेको मेरो कित्ता एप सुशासनका दृष्टिकोणले पनि महत्वपूर्ण मानिएको छ ।

मेरो कित्ता मोवाइल एपबाट कार्यालयमा आवेदन गरिसकेपछि सिष्टमबाट ओटीपी उपलब्ध हुनेछ । कामको प्रगति नियमित अपडेट हुनेछ । ओटीपी र मोवाइल नम्बर प्रयोग गरी कामको प्रगति हेर्न सकिनेछ ।

ईसेवा, खल्ती, कनेक्ट आईपीएस प्लेटफर्म प्रयोग गरी फिल्ड रेखांकनका लागि राजस्व तिर्न सकिनेछ ।

नापी कार्यालयमा सम्पर्क गर्नुपरेमा सम्बन्धित कार्यालयका कार्यालय प्रमुख एवं सूचना अधिकारीको सम्पर्क नम्बर समेत पनि मेरो कित्ता एपबाट प्राप्त गर्न सकिने नापी बिभागले जनाएको छ ।