सशस्त्रमा एसएसपीदेखि एआईजी बढुुवा सिफारिस, कानुनका एसएसपी अर्याल पनि परे

काठमाडौं । गृहमन्त्रालयले सशस्त्र प्रहरी बलमा रिक्त एआईजी पदमा एकमा डीआईजी अन्जनीकुमार पोखरेललाई बढुवा सिफारिस गरेको छ ।

मंगलबार गृह मन्त्रालयमा बसेको बढुवा सिफारिस समितिले पोखरेललाई बढुवा सिफारिस गरेको हो । सशस्त्र प्रहरी बलमा दुईजना एआईजीको दरबन्दी छ । त्यसमध्ये रिक्त एक पदमा पोखरेललाई सिफारिस गरिएको छ ।

पोखरेल अहिले सशस्त्र प्रहरीको बागमती प्रदेश प्रमुख छन् । नारायणदत्त पौडेल आईजीपी बनेपछि सशस्त्रमा एआईजी पद रिक्त भएको थियो ।

त्यसैगरी, एसएसपी राजेन्द्र खड्कालाई डीआईजीमा बढुवा सिफारिस गरिएको छ । एसपी संजय भट्टराईलाई एसएसपीमा बढुवा सिफारिस गरिएको छ ।

साथै कानुनतर्फ एसएसपी युवराज अर्यालयलाई डीआईजीमा बढुवा सिफारिस गरिएको छ । एआईजी बढुवाउपर चित्त नबुझेमा सात दिनभित्र उजुरी गर्न सकिने बढुवा समितिले जनाएको छ ।

सशस्त्रको कानुनमा १५ जनाको मात्र दरबन्दी भए पनि अघिल्लो सरकारले डीआईजीको दरबन्दी सृजना गरेको थियो । अघिल्लो सरकारका गृहमन्त्री ओमप्रकाश अर्यालका आफन्त भएकाले एसएसपी युवराज अर्याललाई बढुवा गर्न डीआईजी दरबन्दी सृजना गरिएको भनेर विवाद भएपछि बढुवा हुन सकेको थिएन ।