सशस्त्रका नवनियुक्त आईजीपीलाई सोमबार दर्ज्यानी चिन्ह प्रदान गरिने

काठमाडौँ । सशस्त्र प्रहरी बल नेपालका नवनियुक्त महानिरीक्षक (आईजीपी)नारायणदत्त पौडेललाई सोमबार दर्ज्यानी चिन्ह (फुली) प्रदान गरिने भएको छ ।

१८ वैशाखमा चार वर्षे पदावधि पूरा गरी पूर्व आईजीपी राजु अर्याल अनिवार्य अवकाशमा गएपछि रिक्त पदमा सरकारले पौडेललाई नियुक्त गर्ने निर्णय गरिसकेको छ । शनिबारदेखि नै पद रिक्त रहे पनि बीचमा दुई दिन सार्वजनिक बिदा परेकाले सोमबार मात्रै फुली लगाउने कार्यक्रम तय गरिएको हो ।

गृह मन्त्रालय उच्च स्रोतका अनुसार, पौडेललाई गृहसचिव राजकुमार श्रेष्ठले दर्ज्यानी चिन्ह लगाउने छन् । यसअघि निवर्तमान गृहमन्त्री सुधन गुरुङले आईजीपीलाई प्रधानमन्त्रीले फुली लगाउने व्यवस्था गरिने बताएका थिए, जससँगै ‘चेन अफ कमाण्ड’ को विषयलाई लिएर पक्ष–विपक्षमा बहस भएको थियो ।

उक्त अभिव्यक्तिपछि आईजीपीलाई कसको हातबाट दर्ज्यानी चिन्ह लगाइने भन्ने विषयमा बहस भएको थियो । नेपाल प्रहरी र सशस्त्र प्रहरी बल नेपाल गृह मन्त्रालय मातहत नै रहेको तथा शान्ति–सुरक्षा र सुव्यवस्था कायम गर्ने सवालमा स्थायी सरकारको प्रतिनिधिका रूपमा गृहसचिवबाटै फुली लगाइँदै आएको प्रचलन कायम राख्नुपर्ने मतसमेत व्यक्त भएका थिए । अन्ततः यसअघिकै प्रचलनअनुसार गृहसचिवबाटै फुली लगाइने तय भएको प्रशासन सिंहदरबार विशेष ब्युरो स्रोतले जनाएको छ ।

गृह मन्त्रालयले सोमबार बिहान पौने ९ बजे फुली लगाउने कार्यक्रम तय गरेको पनि स्रोतले जनाएको छ ।