इन्धनमा फेरि मूल्यबृद्धि, पेट्रोलको मूल्य प्रतिलिटर २ सय नाघ्यो

काठमाडौं । नेपाल आयल निगमले तीन साताका बीचमा तीन पटक इन्धनमा मूल्यबृद्धि गरेको छ । बिहीबार मध्यराति निगमले पुनः पेट्रोलियम पदार्थको मूल्यबृद्धि गरेको छ । निगमले पेट्रोल, डिजेल र मट्टितेलमा प्रतिलिटर १५ रुपैयाँका दरले मूल्यवृद्धि गरेको जनाएको छ ।

चैत २० गते बिहानैदेखि लागु हुनेगरी आयल निगमले मूल्यवृद्धि गरेको जनाएको छ । नयाँ वृद्धि गरिएको मूल्य अनुसार अब तेस्रो वर्ग अर्थात् काठमाडौं, पोखरा र दिपायलमा पेट्रोलको मूल्य प्रतिलिटर २ सय २ रुपैयाँ पुगेको छ । यसअघि प्रतिलिटर १ सय ८७ रुपैयाँ थियो । यी तीन ठाउँमा यसअघि डिजेल र मट्टितेलको मूल्य १ सय ६७ रुपैयाँ लिटर रहेकामा अब १ सय ८२ रुपैयाँ पुगेको छ ।

यस्तै पहिलो वर्गअन्तर्गत रहेका चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्जमा यसअघि पेट्रोलको मूल्य प्रतिलिटर १ सय ८४ रहेकामा अब १ सय ९९ रुपैयाँ ५० पैसा पुगेको छ । डिजेल–मट्टितेलको मूल्य यसअघि प्रतिलिटर १ सय ६४ रुपैयाँ ५० पैसा रहेकामा अब बढेर १ सय ७९ रुपैयाँ ५० पैसा कामय भएको छ ।

यस्तै दोस्रो वर्गमा रहेका सुर्खेत र दाङमा यसअघि पेट्रोलको मूल्य प्रतिलिटर १ सय ८६ रुपैयाँ रहेकामा अहिले बढेर २ सय १ रुपैयाँ पुगेको छ ।

यस्तै त्यहाँ डिजेल–मट्टितेलको मूल्य पहिले प्रतिलिटर १ सय ६६ रुपैयाँ रहेकामा अब बढेर १सय ८१ रुपैयाँ पुगेको छ । आयल निगमले यो मूल्य समायोजनपछि पनि १५ दिनमा ११ अर्ब ७१ करोड निगमलाई घाटा हुने जनाएको छ ।