हर्क साम्पाङको गृहमन्त्रीलाई प्रश्नः प्रतिपक्षी नेतालाई मार्ने धम्की दिनेलाई कहिले पक्राउ गर्छौ ?

काठमाडौं । श्रम संस्कृति पार्टीका अध्यक्ष हर्क साम्पाङले प्रतिपक्षी दलको नेतालाई मार्ने, घरपरिवार जलाउने धम्की दिने रास्वपा कार्यकर्तालाई एक्सन ओरियन्टेड दाबी गर्ने गृहमन्त्रीले कहिले पक्राउ गर्छन् भन्ने प्रश्न गरेका छन् ।

साम्पाङले नेपाल प्रहरीको साइबर ब्यूरोमा सोमबार टिकटकर सुनिता खड्काका बिरुद्ध ज्यान मार्ने र घर जलाउने धम्की दिएकोले कारबाहीको माग गर्दै जाहेरी दिएका थिए ।

टिकटकमा खड्काले आफूलाई मार्ने र घर जलाउने धम्की दिएको भिडियोसहित दिइएको जाहेरीपछि पक्राउ नगरिएकोमा उनले सामाजिक संजालमै गृहमन्त्रीको ध्यानाकर्षण गराएका छन् ।

उनले सामाजिक संजालमा लेखेका छन्–एक्सन ओरिएन्टेड गृहमन्त्रीले नेपाली नागरिकले भारी बहुमत दिई निर्वाचित गरी संसदमा पठाएको एउटा जिम्मेवार प्रतिपक्ष दलको नेतालाई मार्ने र ‘घरपरिवार जलाउने’  धम्की दिने रास्वपाका कार्यकर्तालाई कति दिन, कति हप्ता, कति महिना र कति बर्ष लगाएर पक्रन्छ ? कि आफ्नो भनेर पक्रंदैन ?  त्यो सारा नेपालीले हेरिरहेका छन् है !’