सशस्त्रमा निर्वाचन प्रहरीको ठेक्का : बीसी र अग्रवाललाई मात्रै

काठमाडौं । सशस्त्र प्रहरीमा निर्वाचन प्रहरीको लत्ताकपडा खरिदमा समेत सशस्त्रमा सेटिङ भएको छ । निर्वाचन प्रहरीको लत्ताकपडा, स्वीेटर लगायत सबै खरिद ठेकेदार टोपेन्द्र बीसी र श्रवण अग्रवालले मात्र पाएपछि सेटिङ भएको तथ्य बाहिरिएको हो ।  निर्वाचन प्रहरीका लागि सामान खरिद गर्दा समय छोटो भएकाले टेण्डर नगरी सिधै खरिद गरिएको थियो ।

आर्थिक प्रशासनका प्रमुख एसएसपी विकास घिमिरे र लुम्बिनी प्रदेशका डीआईजी दीपेन्द्र कुँवरकै सेटिङमा बीसी र अग्रवालले सशस्त्रको निर्वाचन प्रहरीको ठेक्का पाएका थिए । गएको भदौमा नेपाल प्रहरीको लत्ताकपडा ठेक्का विवादमा परेपछि गृहमन्त्री अर्यालले रद्द गर्न लगाएका थिए । तर जेनजी आन्दोलनपछि सशस्त्रमा भने लत्ताकपडा खरिद प्रतिस्पर्धाका आधारमा कम दरमा टेण्डर बिट गर्ने कम्पनीले पाएका थिए ।

सेटिङ गर्न नपाएपछि टोपेन्द्र बीसी, श्रवण अगवाल लगायतको समूहले सशस्त्रमा एक्लौटी ठेक्का पाउन सकेनन् । भदौमा प्रतिस्पर्धा हुँदा ठेक्का पाउन नसकेको भन्दै ठेकेदार बीसी र अग्रवाल आईजीपी अर्यालसँगै गएर याचना गरेपछि निर्वाचन प्रहरीको काम भने सबै उनीहरुलाई दिइएको स्रोत बताउँछ ।

निर्वाचन प्रहरीको जुत्ताबाहेक सबै सामान बीसी र अग्रवालले पाएका थिए । जसको चाँजोपाँजो बाहिरै बसेर डीआईजी दीपेन्द्र कुँवरले मिलाएका थिए । कुँवर ३ बर्षभन्दा बढी समय सशस्त्रको प्रबन्धमा बसेकाले उनी सशस्त्रका खरिदमा अहिले पनि हावी छन् । उनकै डिजाइनमा विकास घिमिरेलाई आर्थिक प्रशासनमा सरुवा गरिएको थियो ।

सशस्त्र प्रहरी बलले चुनावको सुरक्षार्थ १५ हजार ३ सय जना निर्वाचन प्रहरी भर्ना गर्ने कोटा पाएको थियो । कानुन समूहका एसएसपी युवराज अर्यालमार्फत् गृहमन्त्री ओमप्रकाश अर्यालसम्म लबिङ गरी सशस्त्रले निर्वाचन प्रहरी भर्ना गर्ने कोटा पाएको थियो ।

गृहमन्त्री अर्याल एसएसपी युवराज अर्यालका नाताले भतिजा पर्ने भएकाले सशस्त्र प्रहरीका आईजीपी राजु अर्यालले उनीमार्फत् निर्वाचन प्रहरीको कोटा यो निर्वाचनमा ल्याउन सफल भएको भएको चर्चा हुने गरेको छ ।