रास्वपा त्यागेका राणा भन्छन् : पार्टीले भोलि सरकारमा गएर उत्कृष्ट काम गर्छ भन्ने विश्वास गर्न सक्दिनँ

काठमाडौं । राष्ट्रिय स्वतन्त्र पार्टी(रास्वपा)का नेता प्रणयशमशेर राणाले त्यागे पार्टी सदस्यता त्यागेका छन् । राणाले पार्टी सदस्यताबाट राजीनामा दिएका छन् । उनले बिहीबार महामन्त्री (कबिन्द्र बुर्लाकोटी) लाई सम्बोधन गरेर पत्र पठाउँदै पार्टी सदस्यताबाट राजीनामा दिएका हुन् ।

राणाले पार्टीमा विशेष परिस्थितिको नाममा भएको बेथितिलाई मुकदर्शक भएर हेर्न नसक्ने भन्दै पार्टीको सबै जिम्मेवारीबाट अलग भएको घोषणा गरेका छन् ।

राणाले भनेका छन्–मेरो राजीनामाको निर्णयबाट प्रभावित हुने स्वदेश र विदेशमा रहनुभएका संगठन एवं शुभेच्छुक साथीहरू समक्ष क्षमायाचना गर्न चाहन्छु । राजनीतिमा कहिले पनि सामान्य परिस्थिति हुँदैनन् । त्यसैले नै सबै भैपरि आउन सक्ने परिस्थितिहरुलाई आँकलन गरेर पार्टीले विधान बनाएको हुन्छ ।

अहिले विशेष परिस्थितिको नाममा बेथिति संस्थागत गर्दै गर्दा भोलि यही कुरा सरुवा, बढुवा, नियुक्तिमा हुँदैन भनेर आम नागरिकले कसरी विश्वास गर्ने ? आफ्नो आन्तरिक अभ्यास सही ढङ्ग नगर्ने पार्टीले भोलि सरकारमा गएर उत्कृष्ट काम गर्छ भन्ने विश्वास म गर्न सक्दिन र अन्धभक्ति गर्न पनि चाहन्न !

राणाले उम्मेदवार छनौटमा प्राइमरी चुनाव नगरेको आरोप लगाउँदा पार्टीको विधान अनुसार काम नगरेको, आधिकांश केन्द्रमा बसेका पदाधिकारी र केन्द्रीय सदस्यहरु बेथितिको साझेदार बनेको बताउदै उनले सुशासन, आर्थिक पारदर्शिता र जवाफदेहिता नारामा मात्र सिमित भएको र अभ्यासमा नभएको आरोप लगाएका छनन् ।

राणा २०७९ को प्रतिनिधिसभाको निर्वाचनमा रास्वपाबाट काठमाडौँ ५ को उम्मेदवार बनेर ५ हजार ४७७ मत प्राप्त गर्दै तेस्रो भएका थिए ।

उक्त क्षेत्रका कार्यक्रममा राणाले पटक पटक रवि लामिछानेलाई लगेर सम्बोधन गराउने प्रयास गरेका थिए । तर लामिछाने २०७९ मा उक्त क्षेत्रमा भाषण गर्न नगई अप्रत्यक्ष रुपमा नेपाली कांग्रेसका उम्मेदवार प्रदीप पौडेललाई सहयोग गरेको बुझाइ राणामा रहँदैआएको थियो ।

यो पटक प्राइमरी इलेक्सनमा भाग लिएका राणाले उक्त इलेक्सनमा रास्वपाले देशभरका उम्मेदवारसँग प्रतिब्यक्ति २५ हजार शुल्क लिएको र टिकट नदिएपछि उक्त रकम फिर्ता हुनुपर्ने माग गर्दैआएका छन् । राणाले प्राइमरी इलेक्सनका नाममा २५ हजार लिनु ठगी भएको उल्लेख गर्दै उक्त रकम फिर्ता मागेका थिए ।