म बालेनलाई चिन्दिनँ, मैले गाडी दिएको पनि छैन : डा. सुजन कडरिया

काठमाडौं ।  राजस्वछली, तस्करी र उपभोक्ता ठगी गरेकोमा कारबाहीमा परेका गुट्खादेखि करेन्ट चाउचाउका मालिक कमलकिशोर मालपानीसँग ८ करोड रुपैयाँको डिफेन्डर गाडी उपहार लिएका रास्वपाका बरिष्ठ नेता बालेन्द्र साह सामाजिक संजालमा ट्रोल छन् ।

बालेन्द्रले विवादास्पद ब्यापारी मालपानीको गाडी उपहारमा लिएको बिषयलाई ओझेलमा पार्न नेकपा (एमाले)निकट अनेरास्ववियुका पूर्वअध्यक्ष डा. सुजन कडरियालाई तान्न खोजेका छन् । सामाजिक संजालमा कडरियाले बालेन्द्रलाई गाडी दिएको बिषय भाइल पारिएको छ । तर कडरियाले भने अहिलेसम्म बालेनलाई नभेटेको र आफूसँग कुनै टेस्ला गाडी पनि नभएको प्रष्ट पारेका छन् । मेरो गाडी एएनआई भएको उल्लेख गर्दै एउटा रातो गाडीको फोटो प्रयोग गरेर नम्बर प्लेट मिल्यो भन्दै समाचार प्रकाशित गरिएकोप्रति कडरियाले आपत्ति जनाएका छन् ।

सामाजिक संजालमा कडरियाले लेखेका छन्–‘यस्ता वाहियात मिडियाको पछाडि लागेर नझुक्किनुहुन हार्दिक अपिल गर्दछु । मैले अहिलेसम्म बालेनलाई भेटेको पनि छैन । मेरो कुनै टेस्ला गाडी पनि छैन । मेरो गाडी एएनवाई (ANY) हो । एउटा रातो गाडी अगाडि मेरो फोटो राखेर नम्बर प्लेट मिल्यो भन्दै पूर्वाग्रहपूर्ण ढङ्गबाट प्रकाशित समाचारप्रति मेरो गम्भीर ध्यानाकर्षण भएको छ ।

यसअघि पनि चिन्दै नचिनेको बालेनको मन्त्री बन्न अखिलबाट राजीनामा भन्ने शीर्षकमा समाचार प्रकाशन भएपछि मैले व्यक्तिगत रूपमा अत्यधिक आलोचना सहनुपरेको थियो । त्यसबाट भएको क्षति कदापि माफ हुन सक्दैन । आज यस्तै सस्तो लोकप्रियतामा चल्ने मिडियाका कारण यथार्थ बुझ्न झन् गाह्रो भएको छ ।

बालेनसँग मेरा साथीभाइहरूको सम्बन्ध छ, भन्ने त्यो नितान्त उनीहरूबीचको व्यक्तिगत सम्बन्ध हो । मेरो भाइको सम्बन्ध पनि उसको निजी मामिला हो र पारिवारिक रूपमा पनि हामी सँगै बस्दैनौँ । म बालेनलाई व्यक्तिगत रूपमा चिन्दिनँ र त्यो मेरा लागि आवश्यक पनि छैन । म सधैँ नेकपा(एमाले) र श्रद्धेय अध्यक्ष केपी शर्मा ओलीको समर्थक हुँ । म एमालेको कार्यकर्ता हुँ र रहनेछु ।’