दिउँसो देउवा र ओली भेट, राति बालेन–रविबीच वार्ता

काठमाडौं । निर्वाचन नजिकिँदै जाँदा देशको राजनीतिक सरगर्मी तीव्र बन्दै गएको छ । राजनीतिक दलका नेताहरुबीच भेटघाट तीब्ररुपमा भइरहेको छ ।

सोमबार काठमाडौंमा दिनभर विभिन्न दलका शीर्षनेताबीच भएका भेटघाटले राजनीतिक वृत्तमा तरंग ल्याएको हो ।

सोमबार दिउँसो नेकपा एमालेका अध्यक्ष केपी शर्मा ओली र महासचिव शंकर पोखरेलले नेपाली कांग्रेसका सभापति शेरबहादुर देउवालाई भेट गरेका थिए । उनीहरूबीच समसामयिक राजनीतिक अवस्थाबारे छलफल भएको बताइएको छ ।

एमालेले लामो समयदेखि संसद् पुनस्र्थापनाको माग गर्दै आएको छ भने कांग्रेसले पनि त्यसमा सहमति जनाउँदै आएको छ । यही सन्दर्भमा देउवा–ओली भेटलाई आगामी राजनीतिक सहकार्यका दृष्टिले महत्वपूर्ण रूपमा हेरिएको छ ।

यसैबीच, सोमबार साँझ राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौं महानगरपालिकाका मेयर बालेन शाहबीच करिब सात घण्टा लामो छलफल भएको छ ।

भेटमा मुख्यतः आउँदो निर्वाचन र समसामयिक राजनीतिक विषयमा कुराकानी भएको बताइएको छ । दुवै नेता तोकिएको समयमै निर्वाचन हुनुपर्ने अडानमा छन् ।

रवि र बालेनलाई परिवर्तन र वैकल्पिक राजनीतिका प्रतीकका रूपमा हेर्नेहरूका लागि उनीहरूको भेटलाई अर्थपूर्ण मानिएको छ। कतिपयले दुवै नेता मिलेर अघि बढ्नुपर्ने माग गर्दै आएका बेला भएको यो भेटले भविष्यमा सहकार्यको सम्भावनाबारे अड्कलबाजी बढाएको छ ।

सरकारले आगामी फागुन २१ गते निर्वाचनको मिति तोकेको छ । मिति नजिकिँदै जाँदा ठूला दलदेखि नयाँ शक्तिसम्म सक्रिय बन्दै गएको देखिन्छ । कांग्रेस–एमालेबीच चुनावमा मिलेर जाने चर्चासँगै बालेन र रवि मिलेर निर्वाचनमा जाने संभावना उनीहरुको भेटघाटबाट देखिएको छ ।