कुलमानको पार्टीको केन्द्रीय सदस्यबाट बिद्या श्रेष्ठले दिइन् राजीनामा

काठमाडौं । तीन वटा बिकासे मन्त्रालय सम्हाल्ने मौका पाएका कुलमान घिसिङले खोलेको उज्यालो नेपाल पार्टीकी केन्द्रीय सदस्य विद्या श्रेष्ठले राजीनामा दिएकी छन् ।

सरकारले हटौंडामा सडक विस्तार गर्दा घरधनीलाई उचित मुआब्जा नदिएको, बिजुली काटेर अन्यायपूर्वक घरजग्गामा बनेको संरचना भत्काएपछि आक्रोसित भएकी उनले सामाजिक सञ्जालबाटै राजीनामा दिएकी हुन् ।

उनले सामाजिक सञ्जालमा लेखेकी छिन्–‘आजदेखि उज्यालो नेपाल पार्टीको केन्द्रीय सदस्यबाट राजीनामाको घोषणा गर्दछु।‘उनले उक्त पार्टीमा बसिरहन नैतिकताले नदिएको भन्दै हेटौंडा पीडितको साथमा रहनेसमेत बताएकी छिन् । ‘अरू अभियन्ता साथीहरू के गर्नुहुन्छ ? मेरो नैतिकताले दिएन । म हेटौंडाका पीडितको साथमा छु ।‘ उनले लेखेकी छिन् ।
यस्तै राजीनामा दिएलगत्तै अर्को पोष्ट गर्दै आफूभित्र नैतिकता भएकैले राजीनामा दिएको भन्दै बुझ्न आग्रह गरेकी छिन् ।

सर्वोच्च अदालतले डोजर नचलाउन र नभत्काउन आदेश दिए पनि जिल्ला प्रशासन कार्यालय मकवानपुरका प्रमुख जिल्ला अधिकारी बसन्त अधिकारीले आदेश आफूले नपाएको बताउँदै आज बिहानैबाट बजारका अस्थायी र स्थायी संरचना भत्काएका छन् ।