जाँचबुझ आयोगको टोली नख्खु कारागार पुग्यो

काठमाडौं । जेनजी आन्दोलनको दमन र भोलिपल्ट नख्खु कारागारमा भएको आगजनी तथा कैदी भागेको घटनाको जाँच गर्न गठित आयोगले सोमबार नख्खु पुगेर थुनामा रहेका राष्ट्रिय स्वतन्त्र पार्टी (रास्वपा) सभापति रवि लामिछानेसँग सोधपुछ गरेको छ ।

आयोगको टोलीले कारागारको समग्र अवस्था निरीक्षण गर्दै लामिछानेसहित नाइके, भाइ-नाइके र अन्य कैदीबन्दीसँग विस्तृत कुराकानी गरेको हो । भदौ २४ मा आन्दोलनकारीको भीड कारागार छिरेपछि लामिछाने बाहिर निस्किएका थिए ।

त्यसपछि सयौँ कैदी फरार भएको आरोप छ । रवि र रास्वपाले भने जेलर सत्यराज जोशीले जारी गरेको पत्रका आधारमा लामिछाने कानुनी रूपमै थुनामुक्त भएको दाबी गरेका छन् ।

आयोगले आइतबार जोशीसँग सोधपुछ गरे लगत्तै सोमबार लामिछानेलाई भेटेको हो । सोधपुछमा लामिछानेले जेलबाहिर निस्कनुपरेको बाध्यता, जेलरको पत्र, भीडको दबाब, सुरक्षा कमजोरी र फुत्केका कैदीको अवस्थाबारे आफ्नो धारणा राखेका छन् ।

आयोगले सबै पक्षको बयान लिएर वस्तुस्थिति पत्ता लगाइ रहेको छ । बुटवलको सुप्रिम सहकारी ठगी प्रकरणमा पक्राउ परेका लामिछाने भैरहवाबाट नख्खु सरुवा भएका थिए। आयोगले आइतबार प्रहरी हेडक्वार्टरलाई पत्र पठाएर भदौ २३र२४ मा ड्युटीमा रहेका सबै प्रहरी इन्चार्जलाई उपत्यका नछाड्न सर्कुलर जारी गराएको छ ।