जेनजी आन्दोलनमा भएका घटना क्षम्य छैनन्, कारबाही हुनुपर्छ : कार्यवाहक सभापति अर्याल

काठमाडौं । राष्ट्रिय स्वतन्त्र पार्टी (रास्वपा) का कार्यवाहक सभापति डोलप्रसाद(डीपी) अर्यालले भदौ २३ र २४ गतेको जेनजी आन्दोलनमा भएका घटना क्षमायोग्य नभएको बकताएका छन् । उनले भदौ २३–२४ को घटनामा संलग्नलाई कानूनी कठघरामा उभ्याउनैपर्ने बताएका छन् ।

भ्रष्टाचारको विरोध र सुशासनको पक्षमा जेनजी पुस्ताले भदौ २३ गते गरेको शान्तिपूर्ण प्रदर्शनमा सहभागी स्कुले बालबालिकामाथि सरकारले गोली हानेर हत्या गरेको र २४ गते राष्ट्रका महत्त्वपूर्ण संरचनामा आगो लगाएर विध्वंस मच्चाएकाले दुवै दिनका घटना क्षम्य नभएको उनले बताए ।

सोमबार भैरहवामा आयोजित पत्रकार सम्मेलनमा उनले भने–‘भदौ २३ गते जसरी गोली प्रहार गरेर स्कुलका बालबालिकाको हत्या गरिएको छ । त्यसैगरी २४ गते व्यक्तिका निजी सम्पत्ति र देशका महत्त्वपूर्ण सरकारी र ब्यक्तिका निजी सम्पत्तिमाथि आगजनी र तोडफोड गरी विध्वंस मच्चाइएको छ, यी दुवै अपराधिक घटना हुन्, दुवै घटनामा संलग्नलाई सरकारले कानुनी कठघरामा उभ्याउनुपर्छ ।’

अन्तरिम सरकारले गठन गरेको छानबिन आयोगले घटनाको छानबिन गरिरहेको र उक्त आयोगले नपुगे अझै शक्तिशाली र उच्चस्तरीय आयोग गठन गरेर भए पनि दुवै दिनको घटनाको सत्यतथ्य छानबिन हुनुपर्ने अर्यालले बताएका छन् ।

उनले भदौ २३ गतेको जेनजीको आन्दोलनमा आफ्नो पार्टीले संस्थागत रुपमै समर्थन जनाए पनि २४ गतेको घटनामा पार्टीको कुनै पनि संलग्नता नभएको बताए ।

अर्यालले रास्वपाका कुनै पनि नेता तथा कार्यकर्ता निजी वा सरकारी भौतिक संरचनामा तोडफोड र आगजनीमा संलग्न रहेको पाइएमा पार्टीले कारबाही गर्ने बताए ।

नख्खु कारागारको घटनाको विषयमा आफूसहित रास्वपाका नेताहरू जोडिएको विषयमा बोल्दै अर्यालले पार्टी सभापतिको सुरक्षाका लागि लिएर जान कारागार प्रशासनले भनेपछि आफूहरू गएको दाबी गरे । उनले भने–‘कारागार प्रशासन र त्यतिबेलाको राज्यको माथिल्लो निकायबाट कारागारमा पार्टी सभापति असुरक्षित हुनसक्ने भन्दै लैजान हामीलाई भनिएकोले म आफैं पनि कारागार गएको हुँ, यदि त्यो मेरो गल्ती वा अपराध हो भने कारबाही भोग्न तयार छु ।’