विद्याको घर जलाएको आरोपमा पक्राउ परेका थेवे एमाले युवासंघकै कार्यकर्ता

काठमाडौं । ‘जेनजी’ आन्दोलनका क्रममा पूर्वराष्ट्रपति विद्या भण्डारीको घर जलाएको आरोपमा पक्राउ परेका सोनम थेबे नेकपा (एमाले) निकट राष्ट्रिय युवा संघ नेपालका कार्यकर्ता भएको खुलासा भएको छ ।

ताप्लेजुङ सिरिजङ्घा गाउँपालिका–१ सिनाम स्थायी घर भई हाल काठमाडौं धुम्बारहीमा बस्ने थेबे आइतबार पक्राउ परेका हुन् ।

थेबे गुण्डा नाइके चक्रे मिलन समूहका हुन् । उनले धुम्बराही क्षेत्रका व्यवसायीहरुलाई धाकधम्की दिई रकम असुल गर्ने गर्दै आएका थिए । गुण्डागर्दीमा सलंग्न थेवे पटके गुण्डा समेत हुन् । व्यवसायीहरुका अनुसार मिटरब्याजमा लगाएका पैसा असुल्ने समूहको नेतृत्व गरिरहेका थेवेले होटल तथा रात्री व्यवसायी, जग्गा व्यवयायीसँग हप्ता असुल्ने गरेका छन् ।

गुण्डागर्दी, मिटरब्याज र दक्षिण कोरिया पठाइदिने भन्दै पैसा असुलेको आरोप लागेका थेवेलाई यसअघि पनि प्रहरीले खोजी गर्दा नेकपा (एमाले) का नेताहरुले पक्राउ नगर्न प्रहरीलाई पटक पटक फोन गरेका थिए ।

प्रहरीले यसअघि उनकै गाउँ ताप्लेजुङ सिरिजङ्घा गाउँपालिका–१ सिनाम घर भई हाल काठमाडौँ महानगरपालिका–१ नक्सालबस्ने ३८ वर्षीय साहारा सुब्बा (थेवे) लाई पक्राउ गरेको थियो ।

प्रहरीले वैदेशिक रोजगारका लागि दक्षिण कोरिया पठाइदिने भन्दै १ करोड ८ लाख ३० हजार ठगी गरेको अभियोगमा उनलाई काठमाडौँ उपत्यका अपराध अनुसन्धान कार्यालयले ५ भदौ २०८२ मा पक्राउ गरेको थियो । प्रहरी स्रोतका अनुसार यो ठगीमा सनम थेवे पनि संग्लन थिए । तर ताप्लेजुङका एमालेका नेताहरुको दबाबमा यो थप अनसन्धान रोकिएको थियो ।
उनी एमाले र युवा संघका सक्रिय कार्यकर्ता हुन् । विभिन्न कार्यक्रमहरुमा युवाहरु भेला पारेर उनले लैजाने गरेका थिए ।

थेवे तिनै गुण्डा हुन्, जो प्रहरीले निकाल्ने गुण्डानाइकेको सूचीमा जहिल्यै पर्छन् । प्रहरीले यसअघि सुरक्षा चुनौती दिनसक्ने १ सय ३१ गुण्डाहरुको सूचीमा पनि उनी थिए । महानगरीय प्रहरी कार्यालयले यसअघि पटक–पटक महानगरीय अपराध महाशाखासहित काठमाडौ, ललितपुर र भक्तपुर परिसरलाई सूचीसहित परिपत्र गर्दा यी थेवेका नाम पनि थियो ।