नेपाली खाद्यान्नलाई परिस्कृत गर्दै विश्वबजारमा पुर्याइनुपर्छ : मन्त्री खड्का

भक्तपुर । ऊर्जा, जलस्रोत र सिंचाई मन्त्री दीपक खड्काले नेपाली र थाई खानाको सांस्कृतिक महत्वलाई जोड दिँदै नेपाल र थाइल्याण्डको आपसी सम्बन्धलाई थप सुदृढ बनाउन र नेपाली भोजनको अन्तर्राष्ट्रिय प्रचार प्रसारका लागि भोजन लिपी स्वाद कार्यक्रमको महत्त्वलाई उच्च मूल्याङ्कन गरेका छन् ।

मन्त्री  खड्काले भोजन लिपि स्वाद कार्यक्रमको छैटौं संस्करणको उदघाटन समारोहमा भने–थाई खाना नेपालीलाई र नेपाली खाना विदेशीलाई परिचित गराउनु हाम्रो साझा जिम्मेवारी हो । यसले आपसी मित्रता र सांस्कृतिक सम्बन्धलाई बलियो बनाउँछ, साथै थाइल्याण्डसँगको हाम्रो सम्बन्धलाई अझ प्रगाढ बनाउँछ ।’

मन्त्री खड्काले यस कार्यक्रमलाई नेपाल र थाइल्याण्डबीचको खाद्य संस्कृति र आपसी मित्रता थप प्रगाढ बनाउन एक महत्वपूर्ण कदम मानेका छन् । उनले थपे–‘नेपालमा पनि सुरक्षित र स्वस्थ भोजन प्रबद्र्धन गर्नका लागि हामी निरन्तर प्रयासरत छौं । नेपाली खानालाई अन्तर्राष्ट्रिय बजारमा प्रस्तुत गर्दा त्यसको परिष्कृत रूपले विदेशी बजारमा राम्रो प्रतिस्पर्धा गर्न सक्छ ।’

कार्यक्रममा रायल थाई दूतावास, काठमाडौंका राजदूत माननीय सुवापोंग सिरिसोर र कार्यक्रमका अध्यक्ष गणेश ढकालले पनि नेपाली र थाई खाद्य संस्कृति बीचको सम्वन्धलाई बढावा दिनको लागि यस्तो आयोजनालाई समर्थन गर्नुपर्ने बताए ।

कार्यक्रमको संयोजन भोजन लिपी स्वाद अभियानका संयोजक देवी सापकोटाले गरेका थिए । र, सेफ घनश्याम कँडेल र उनको टीमले तयार पारेका विभिन्न थाई र नेपाली परिकारहरूले आगन्तुकहरूको मन जितेको थियो । आगन्तुकहरूले समृद्ध संस्कृतिका स्वाद अनुभव गर्दै कार्यक्रमको आनन्द लिएका थिए ।