रास्वपाले भन्यो- ‘देश भ्रष्टाचारको म्युजियम बन्दैछ’

काठमाडौँ। राष्ट्रिय स्वतन्त्र पार्टी (रास्वपा) सांसद असिम शाहले नेपाल भ्रष्टाचारको म्युजियम बन्न लागेको भन्दै संसदमा चिन्ता व्यक्त गरेका छन् ।

भिजिट भिसा प्रकरणमा संसदीय छानबिन समितिको माग गर्दै रास्वपाले निरन्तर संसद विरोध गर्दै आएको छ । सभामुख देवराज घिमिरेले रास्वपा सांसद शाहलाई बोल्न समय दिएका थिए ।

‘कहिले भुटानी शरणार्थीको भेषमा आफ्नै देशको नागरिक बेच्छ । कहिले ललिता निवास बचाउनु पर्नेले सरकारी जग्गा पचाउँछ,’ भिजिट भिसा प्रकरणमा बोल्ने क्रममा शाहले भने,‘कहिले क्विन्टलका क्विन्टल सुनलाई ‘बिस्कुट’ भनेर भित्र्याउँछ । कहिले वाइडबडी उडाउने नाममा राज्यको ढुकुटी उडाउँछ । कहिले एयरपोर्ट बनाउने नाममा भ्रष्टाचारको ओलम्पिकमा नयाँ कीर्तिमान कायम गर्छ।’

‘बेस्ट-सेलर’ सूचीमा नयाँ अध्यायको रूपमा ‘भिजिट भिसा काण्ड’ आएको उनले बताए । एक महिनादेखि सदनमा राजनीतिक नाटक मञ्चन भइरहेको शाहले बताए ।

‘सिन्डिकेटको ‘प्रोडक्ट क्याटलग’ पनि गजबकै छ । यो सामान्य ठगी होइन । यो हजारौँ नेपाली युवाको सपना, परिवारको सम्पत्ति र सिंगो भविष्यमाथिको सुनियोजित डकैती हो,’ शाहले भने,‘यस्तो मुद्दामा तत्काल निष्पक्ष छानबिन नगरेर सरकार मूकदर्शक बन्दा देशमा सरकार होइन, सर्कस चलिरहेको छ जस्तो लाग्छ।’

हालका गृहमन्त्री रमेश लेखकले मन्त्रीमाथि प्रश्न उठे, नैतिकताको आधारमा राजीनामा दिनुपर्ने संसदमा बताएको स्मरण गराउँदै शाहले उनीमाथि त्यही प्रश्न उठेको बताए । गृहमन्त्रीप्रति संकेत गर्दै भने, ‘अब उपदेश होइन, आचरण देखाउने समय हो। नत्र इतिहासले तपाईँलाई ‘काफिला लुटिँदा मौन बस्ने कायर रहबर’ का रूपमा सम्झिनेछ ।’