बारामा बाघको आक्रमणबाट बाख्रा चराउन गएका गोठालोको मृत्यु

असार। बारास्थित जंगलमा मंगलवार बाख्रा चराउन गएका एकजना गोठालालाई बाघले आक्रमण गर्दा ज्यान गएको छ ।

मकवानपुर मनहरी गाउँघर भई हाल बारा जितपुरसिमरा उपमहा नगरपालिका २१ अमलेखगंज बस्ने बिर बहादुर थिङको बाख्रा चराउन गएका स्थानिय चन्द्र बहादुर भुलनको बाघको आक्रमणबाट ज्यान गएको हो ।

बाख्रा चराउने कामदारको रुपमा काम गर्दै आएको ५५ वर्षिय चन्द्र बहादुर भुलन सोही ठाउँका चकरी जङ्गलमा ३०/४० वटा बाख्रा लिएर चराउन गएकोमा घर फर्किएर नआएपछि आफन्तहरुले प्रहरी लाई मंगलवार साँझ खबर गरेका थिए ।

खबर पछि ईलाका अम्लेखगंज सहितको टोली र स्थानीय मानिस खोजतलास गर्दा आज बिहान साढे ७ बजे दक्षिणकाली सामुदायिक बनको खोल्सामा बाघले खाएको जस्तो अवस्थामा भुलनको शरीर मृत फेला परेको र २७ वटा मात्र जिउदो बाख्रा फेला परेको बारा प्रहरीको सूचनामा उल्लेख गरिएको छ ।

मृतकको शव पोष्टमार्टमका लागि जिल्ला अस्पताल पठाइएको तथा घटना बारे अनुसन्धान भईरहेको जिल्ला प्रहरी कार्यालय बाराका प्रवक्ता डिएसपी विजयराज पण्डितले जानकारी दिए ।