अस्पताल निर्माणमा भ्रष्टाचार गर्ने एमालेका प्रदेश सांसद ठाकुर निलम्बित

काठमाडौं । नेकपा (एमाले)का प्रदेश सांसद दीपेन्द्रकुमार ठाकुरबिरुद्ध अस्पताल निर्माणमा भ्रष्टाचार गरेको आरोपमा अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ ।

अख्तियारले धनुषाको औरही नगरपालिकामा अस्पताल निर्माणका क्रममा अनियमितता गरेको आरोपमा ठाकुरविरुद्ध मंगलबार मुद्दा दायर गरेको हो ।

आयोगले नगरपालिकाका कर्मचारीलाई समेत प्रतिवादी बनाएर मुद्दा दायर भएको छ । ठाकुर धनुषाको क्षेत्र नम्बर ३‘ख’ बाट निर्वाचित सांसद हुन् ।

मुद्दा दायर भएसँगै उनको सांसद पद स्वतः निलम्बनमा परेको छ ।

ठाकुर एमालेको मधेश प्रदेशका संसदीय दलका उपनेता हुन् ।

अस्पताल निर्माणमा अनियमितता गर्ने प्रदेश सांसद ठाकुरसहित १७ जनाबिरुद्ध अख्तियारले मुद्दा दर्ता गरेको छ ।