सप्तरी घटना बुझ्न सशस्त्र प्रहरीको मुख्यालय पुगे गृहमन्त्री लेखक

काठमाडौँ । गृहमन्त्री रमेश लेखक हिजो सप्तरीमा दुई जना गोताखोर बेपत्ता भएको घटना बुझ्न शुक्रबार सशस्त्र प्रहरी बल मुख्यालय हलचोक पुगेका छन् ।

उनलाई निमित्त संगठन प्रमुख सशस्त्र प्रहरी अतिरिक्त महानिरीक्षक नारायण दत्त पौडेलले घटनाबारे जानकारी गराए ।

सशस्त्र प्रहरी वरिष्ठ उपरीक्षक दिग विजय सुबेदीले बिहीबारको घटना र हाल सशस्त्र प्रहरी बलमा गोताखोरको सङ्ख्या, अन्य विपद् उद्धारका तालिम प्राप्त जनशक्ति तथा काम कारबाहीबारे विस्तृत रूपमा जानकारी गराएका छन् ।

सशस्त्र प्रहरी बल नेपाल नं। २ छिन्नमस्ता बाहिनी मुख्यालय महोत्तरीका बाहिनीपति सशस्त्र प्रहरी नायब महानिरीक्षक कृष्ण ढकाल र दन्तकाली तालिम शिक्षालयका समादेशक सशस्त्र प्रहरी वरिष्ठ उपरीक्षक नेत्र कार्कीले पनि भर्चुअल माध्यम बाट घटना बारे जानकारी गराएका थिए ।

गृहमन्त्रीसँगै राज्य व्यवस्था समितिका सभापति रामहरि खतिवडा, निमित्त गृहसचिव जय नारायण आचार्य, सहसचिव रामचन्द्र तिवारीलगायत गृह मन्त्रालयका अधिकारीहरू समेत सहभागी भएका थिए ।

गृहमन्त्री लेखकले घटना प्रति दुःख व्यक्त गर्दै मन्त्रालयबाट के गर्न सकिन्छ त्यसमा लाग्ने बताए । खतराजन्य उद्धारमा खटिने जनशक्तिको जीवन बिमा बारे मन्त्रालयले थप कार्य गर्ने बताउँदै उनले अभ्यासका क्रममा ज्यान गुमाएका राष्ट्र सेवकको शोकलाइ शक्तिमा बदल्दै आगामी दिनमा थप सचेत र सुरक्षा अपनाउन जरुरी रहेको बताएका छन् ।