गभर्नर पौडेलविरुद्ध रिटको सुनुवाइ आज

काठमाडौँ । सर्वोच्च अदालतमा नेपाल राष्ट्र बैंकका गभर्नर प्रा. डा. विश्व पौडेलविरुद्ध दायर रिटको सुनुवाइ आज (बुधवार)का लागि पेसी तोकिएको छ। मंगलवार अधिवक्ताहरू विशाल थापा, प्रतिभा उप्रेती र अनन्तराज लुइँटेलले पौडेलको नियुक्ति बदर गर्न माग गर्दै रिट दर्ता गरेका हुन्। रिटमा नेपाल राष्ट्र बैंक ऐन २०५८ अनुसार आवश्यक विज्ञता नपुगेको व्यक्तिलाई गभर्नर नियुक्त गरिएको आरोप लगाइएको छ।

अधिवक्ताहरूले पौडेलको सिफारिस, नियुक्ति र शपथ ग्रहणको निर्णय गैर कानुनी भएको जिकिर गरेका छन्। उनीहरूले नेपालको संविधानको धारा १३३ (२) र (३) बमोजिम उत्प्रेषणको आदेशद्वारा नियुक्ति बदर गर्न तथा नोटमा हस्ताक्षरजस्ता गम्भीर राष्ट्रिय महत्त्वका कार्यमा पौडेललाई कुनै पनि दूरगामी कदम चाल्नबाट रोक लगाउन प्रतिषेध मिश्रित परमादेशको माग गरेका छन्।

यसअघि, पौडेल गभर्नर नियुक्त हुनुअघि नै अधिवक्ताहरूले उनको नियुक्ति रोक्न माग गर्दै सर्वोच्चमा रिट दायर गरेका थिए। तर, प्रशासनले उक्त रिट दरपिठ गरिदिएको थियो र इजलासले पनि सो निर्णयलाई सदर गरेको थियो।

यसैबीच, सरकारले अर्थ मन्त्रालयसम्बद्ध सार्वजनिक निकायका पदाधिकारी तथा सदस्यको नियुक्ति र मनोनयनसम्बन्धी मापदण्ड, २०७३ संशोधन गरेपछि अधिवक्तात्रयले उक्त संशोधन खारेज गर्न माग गर्दै अर्को रिट दर्ता गरेका थिए।

गत वैशाख २ गते सर्वोच्चले गभर्नर नियुक्तिमा ६५ वर्षे उमेरहद संशोधन नगर्न अन्तरिम आदेश जारी गरेको थियो। उक्त रिटसँगै गभर्नर नियुक्तिविरुद्धको रिटलाई एकसाथ राखी आज सर्वोच्च अदालतमा सुनुवाइ हुँदैछ।