सिन्धुपाल्चोकमा माओवादीको आधार इलाकाका पालिकामै धेरै बेरुजु

चौतारा । सिन्धुपाल्चोकका १२ स्थानीय सरकारमध्ये माओवादीले नेतृत्व गरेको पालिकामा धेरै बेरुजु देखिएको छ ।

महालेखा परीक्षक कार्यालयले सार्वजनिक गरेको प्रतिवेदन अनुसार सवैभन्दा धेरै बेरुजु माओवादीका केन्द्रीय तहमा रहेका नेताहरु रहेको चौतारासाँगाचोक गढी नगरपालिकामा रहेको छ । जहाँ माओवादी उपाध्यक्ष अग्नी सापकोटामा भाइ कृष्णप्रसाद सापकोटा मेयर छन् ।

यो नगरपालिकामा माओवादी बहुमतमा पनि छ । यहाँ २३ करोड ३ लाख ६४ हजार रुपैयाँ बेरुजु देखिएको प्रतिवेदनमा उल्लेख छ । रकमको आधारमा बेरुजुमा यो पालिका १२ स्थानमा छ । कुल वजेटको आधारमा वेरुजु ७.६७ प्रतिशत हो भने प्रतिशतको आधारमा पनि १२ औं स्थान हो । यो पालिका सिन्धुपाल्चोकबाट केन्द्रीय तहमा प्रतिनिधित्व गर्ने सवै नेताहरुको गृहपालिका हो ।

माओवादी उपाध्यक्ष,अग्नि सापकोटा, सांसद तथा अग्निका भतिजा माधव सापकोटा, प्रदेश सांसद युवराज दुलाल तथा केन्द्रीय सदस्य कृष्णप्रसाद सापकोटा र अर्का केन्द्रीय सदस्य रामप्रसाद सापकोटा पनि यही पालिकाका बासिन्दा हुन् ।

त्यसो त कार्यकारी अधिकृतसमेत उनीहरुले हसियाँ हथौडा छापे बन्धु बैकुण्ठप्रसाद सापकोटा छन् । बैकुन्ठ बुढानीलकन्ठ नगरपालिका, गोकर्णेश्वर नगरपालिका हुँदै राजस्व अनुसन्धान कार्यालय पथलैया हुँदै चौतारा साँगाचोकगढीको प्रमुख प्रशासकीय अधिकृतमा सरुवा भएका हुन् । यातायात कार्यालयमा समेत बसिसकेका यी सापकोटा निजामतीमा अकूत सम्पत्ति कमाउने उपसचिवमध्ये १० जनाभित्र पर्दछन् ।

माओवादीले नै नेतृत्व गरेको लिसंखुपाखर गाउँपालिका र जुगल गाउँपालिकामा पनि बेरुजु धेरै देखिएको छ । माओवादीका तर्फबाट राजु लामा अध्यक्ष रहेको लिंसंखुपाखर गाउँपालिकामा ६ करोड पन्ध्र लाख रुपैयाँ बेरुजु देखिएको छ ।

सिन्धुपाल्चोकका १२ पालिकामध्ये बेरुजुको ११ औं स्थानमा यो पालिका परेको छ । माओवादीका गंगा तामाङ अध्यक्ष रहेको बलेफी गाउँपालिकामा पनि ५ करोड छपन्न लाख रुपैयाँ वेरुजु देखाइएको छ । यो पालिका बेरुजु धेरै हुनेमध्ये आठौं स्थानमा परेको छ ।

त्यसैगरी माओवादीले नै नेतृत्व गरेको जुगल गाउँपालिकामा दुई करोड ४१ लाख रुपैयाँ बेरुजु देखाइएको छ । प्रतिशतको आधारमा यो पालिका ६ औं स्थानमा बेरुजुमा परेको छ । सिन्धुपाल्चोकका १२ स्थानीय तहमध्ये चार पालिकामा माओवादीबाट बिजयी जनप्रतिनिधिको नेतृत्व रहेको छ ।

बेरुजुमा उनीहरु अग्रपक्तिमा छन् । जिल्लाको एमालेले नेतृत्व गरेको इन्द्रवती गाउँपालिकामा सवैभन्दा थोरै बेरुजु रहेको प्रतिवेदनमा उल्लेख छ । जहाँ एमालेका झम्क नेपाल अध्यक्ष छन् । दोस्रो कम बेरुजू काँग्रेस नेतृत्व रहेको भोटेकोशी गाउँपालिका रहेको छ ।