जनमतका लुम्बिनी प्रदेश सांसद गुरुङले दिए राजीनामा

काठमाडौं । लुम्बिनी प्रदेशसभाका सांसद गीता गुरुङले पदबाट राजीनामा दिएकी छिन् । सीके राउत नेतृत्वको जनमत पार्टीकी समानुपातिक सांसद गुरुङले आज लुम्बिनीका सभामुखसमक्ष आफ्नो राजीनामापत्र बुझाएकी हुन् ।

जनताले तिरेको करबाट तलब खान उपयुक्त नभएको भन्दै आजकै मितिबाट लागू हुने गरी राजीनामा दिएको उनले बताएकी छिन् । साथै गुरुङले राजीनामामा देश र जनताको पीर मर्का आफूले राम्ररी बुझेको तर राष्ट्र र जनताभन्दा माथि केही हुँदैन भन्ने मान्यता रहेको उल्लेख गरेकी छिन् ।

‘मेरा आदरणीय जनताको सेवा गर्न र मप्रति कार्यक्षमताको आश गरिबसेका मेरा स्वाभिमानी जनता आमाबुबा, दाजुभाइ दिदीबहिनीलगायतका आशाका किरणहरू स्वलुप्त भइरहेको मलाई आभाश भइरहेको छ’, उनले पत्रमा लेखेका छन् ।