भारत र पाकिस्तानबीच युद्धविराम

काठमाडौं । भारत र पाकिस्तानबीच युद्धविराम भएको छ । भारतका विदेश सचिव विक्रम मिश्रीले आफ्नो देश र पाकिस्तानले युद्धविराममा सहमति जनाएको पुष्टि गरेका छन् ।

मे १० तारिख साँझ ५ बजेदेखि युद्धविराममा सहमति लागु भइसकेको उनले बताएका छन् । उनका अनुसार, पाकिस्तानका सैन्य अपरेसन महानिर्देशक (डीजीएमओ)ले स्थानीय समयानुसार शनिबार दिउँसो आफ्नो भारतीय समकक्षीसँग फोनवार्ता गरेका थिए । त्यसक्रममा भारतीय समयानुसार साँझ ५ बजेदेखि दुवै पक्षले ‘सबै गोलाबारी र सैन्य कारबाही रोक्ने’ सहमति भएको थियो ।

दुई देशका महानिर्देशकले सोमबार फेरि छलफल गर्ने तय भएको बताइएको छ ।

कश्मिरको पहलगाममा अप्रिल २२ तारिखमाआतंकवादीले २६ हिन्दूको नृशंस हत्यापछि भारतले पाकिस्तानमाथि आक्रमण गरेको थियो । पाकिस्तानले आतंकवादीलाई संरक्षण गरेको आरोपसहित भारतले आक्रमण गरेको थियो ।