यस्तो छ माओवादीको पहाडी लोकमार्ग केन्द्रित अभियानको तालिका

काठमाडौं । नेकपा माओवादी केन्द्रले जेठ १ गतेदेखि मध्य पहाडी लोकमार्ग केन्द्रित अभियानमा निस्कने भएको छ । हालैमात्र तराई मधेश जागरण अभियान टुंग्याएको माओवादीले अब पहाडी भेगका जनतालाई लक्षित गरी अभियान थाल्न लागेको हो ।

माओवादीले अबको अभियानको कार्यतालिका समेत सार्वजनिक गरेको छ । माओवादीले जनाएका अनुसार अभियान टोली २ गते बैतडीको पाटनमा जनसभा र डोटी दिपायल जनसंवाद, ३ गते अछाम मंगलसेन जनसंवाद, ४ गते दैलेख सदरमुकाम जनसभा गर्ने कार्यक्रम तय भएको छ ।

यस्तै, जेठ ५ गते जाजरकोट खलंगा जनसंवाद, ६ गते पश्चिम रुकुमको चौरजहारी जनसभा र मुसिकोट जनसंवाद, ७ गते पूर्वी रुकुमको रुकुमकोट जनसंवाद र रोल्पाको थबाङमा जनसभा, ८ गते बागलुङ जनसंवाद, ९ गते पर्वत कुस्मामा जनसंवाद र १० गते पोखरा जनसभा गर्ने माओवादीले जनाएको छ ।

अभियानको नेतृत्व अध्यक्ष पुष्पकमल दाहाल प्रचण्डले गर्ने भएका छन् । अभियानमा प्रचण्डसहित पार्टीका अन्य पदाधिकारीहरु पनि सहभागी हुुने बताइएको छ । तराई मधेश जागरण अभियानले पार्टीप्रति जनताको आकर्षण बढेको निष्कर्षसहित माओवादीले दोस्रो चरणमा यो अभियान सुरु गर्न लागेको हो ।