अर्थमन्त्री पौडेलले गरे प्रचण्डसँग भेटवार्ता, बजेट निर्माणका बारेमा छलफल

काठमाडौं । अर्थमन्त्री बिष्णुप्रसाद पौडेल र नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’बीच भेटवार्ता भएको छ । मंगलबार बिहान प्रचण्ड निवास खुमलटारमा उनीहरूबीच भेटवार्ता भएको हो ।

एमालेका उपाध्यक्षसमेत रहेका पौडेलले आगामी आर्थिक वर्षको बजेट निर्माण र समसामयिक राजनीतिक विषयमा पूर्वप्रधानमन्त्रीसमेत रहेका प्रचण्डसँग विमर्श गरेको सचिवालयले जनाएको छ ।
सरकारले गत शुक्रबार आगामी आर्थिक वर्षको नीति तथा कार्यक्रम ल्याएको थियो ।

प्रधानमन्त्री केपी शर्मा ओलीले अध्यक्ष प्रचण्डसँग भेटेपछि सत्ता समीकरण तलमाथि पर्ने हल्ला कांग्रेसबृत्तमा चलेलगत्तै अर्थमन्त्री पौडेलको भेटलाई अर्थपूर्ण रुपमा लिइएको छ । ओली–प्रचण्डबीचको तिक्ततापूर्ण सम्बन्धपछि भएको भेट र बजेट निर्माणका क्रममा अर्थमन्त्रीले गरेको वार्ताले राजनीतिलाई झन् तरंगित पारेको छ ।