देश बनाउन स्टन्ट होइन, काम गर्ने युवा बनौँ: सुनिता डंगोल

काठमाडौँ । काठमाडौँ महानगरपालिकाकी उपप्रमुख सुनिता डंगोलले आफ्नो पार्टी नेकपा एमालेले सामाजिक सञ्जालमा भाँडभैलो गरेर उग्र बन्न नसिकाउने बताएकी छिन् ।

लोकतन्त्र दिवसको अवसर पारेर काठमाडौँको भृकुटिमण्डपमा आयोजित युथ सेलिब्रेसन कार्यक्रमलाई सम्बोधन गर्ने क्रममा उनले यस्तो बताएकी हुन् । सम्बोधनको क्रममा उपप्रमुख डंगोलले आफूलाई एमाले मन पर्नुको कारण खुलाएकी थिइन् ।

‘एमालेले कसैको घर जलाउन सिकाउँदैन । कहीँ कतै लुटपाट गर्न युवा प्रयोग गर्दैन । एमालेले आफ्नो दश नंग्रा खियाएर राष्ट्रका लागि काम गर्न सधैँ प्रेरित गरिरहन्छ,’ उपप्रमुख डंगोलले भनिन्, ‘त्यसकारण मलाई एमाले मन पर्छ । सोसल मिडियामा भाँडभैलो गरेर उग्र बन्न एमालेले सिकाउँदैन । एमालेले राम्रा कामका प्रचार प्रसार गर्न युवा शक्तिको सदुपयोग गर्छ । त्यसकारण मलाई एमाले मन पर्छ ।’

उनले देश बनाउनका लागि स्टन्ट गर्न नहुने पनि बताइन । ‘अहिले हामी देख्छौँ, धेरै जना स्टन्ट गर्नुहुन्छ । बोल्नुहुन्छ, पपुलर बन्नुहुन्छ । अनि पपुलर बनेर मात्रै देश बन्छ जस्तो पनि गर्नुहुन्छ । तर, स्टन्ट गरेर देश बन्दैन,’ डंगोलले भनेकी छिन्, ‘स्टन्ट गरेर देश बन्दैन । स्टन्ट गरेर देश बन्छ रु देश बनाउने हो भने स्टन्ट गर्ने होइन, काम गर्ने युवा बनौँ ।’

उनले अहिले आफ्नो पार्टीको नेतृत्व र आफूलाई समेत चारैतिबाट आक्रमण भइरहेको बताइन् । ‘अहिले हामीलाई चारैतिरबाट आक्रमण भएको महसुस गर्न सक्छौँ । जतिसुकै आक्रमण भए पनि हामी विचलित हुने छैनौँ । राष्ट्र निर्माणमा एकजुट भएर लाग्नेछौँ,’ डंगोलले भनिन् ।

आफू सधैँ आफ्नो पदप्रति बफादार भएर काम गरिरहेको उनको भनाइ छ ।